Spirituwal nga mananambal (1)

Daghan na kita’g nabalitaan nga mga milagroso nga pag-ayo sa sakit pinaagi sa pagtuo diha sa kalambigitan sa gahum nga spirituwal, pinaagi sa pag-inom  sa tubig - nagtubod sa kapilya, pagpahid o paghikap sa bao nga may santos nga imahe, pagpahid sa milagrosong luha nga dugo, matud pa nangaayo ang sakit.

Kini karon nga hisgutan nato, mga tawo kining mananambal nga ang pag-ayo, nakasandig sa spirituwal nga gahum. Dunay alagad o magwawali sa simbahan, nga gihataga’g gahum sa pag-ayo sa sakit pinaagi sa pag-ampo sa masakiton, apan di tanan ang gitugahan ining hiyas sa panambal nga spirituwal

Apan adunay tawo nga dili relihiyoso, apan gitugahan sa gahum sa pagka-mananambal nga spirituwal. Gitawag ni sila’g tambalan, nga dinhi sa Sugbo  daghan ang nabaniog ini nga matang sa panambal. Duna kadto sa Mabini, sa Guadalupe, sa Talisay ug sa Lahug. Ambot kaha kun naa pa ba sila karon.

Wala kaayo ko makasinati sa ilang kinabuhi, gawas sa bana sa akong ig-agaw, nga tambalan diha sa Tangke, Talisay nga si Manoy Victorio. Sa buhi pa kadto, simple lang ang panginabuhi, nga magbiyahian sa mga kanait nga isla sa Bohol ug Opon, magtumod og kinhason ug ubang produkto sa dagat. Wa siya masayod nga modagan gihapon ang gigamit niyang bangka, bisa’g nahutdan na’g grudo. Hangtud iyang nadiskitahan nga duna na siyay gihabak nga gamitoy nga garapang itom nga may lana, papel ug perlas nga itom. Niya pa, dili siya gusto mobiya sa iyang pamilya, kay gitugahan siya’g tahas nga 15 o 20 ka tuig nga di mopakita og tawo, aron kahatagan og gahum sa pagpanambal

Usa lang ang nakasuhong nga makapabuhi unta siya’g patay, dihang hapit na matapos ang tahas, may nakasil-ing kaniya nga babaye didto sa lasang.