Nagnihit nga

Daghan ang nagkatawa sa advisory sa Metro Cebu Water District alang sa mga konsumedor niini nga maghipos og tubig niining panahon sa ting-init. Kinsa ba kuno ang dili makakatawa tungod kay unsaon man kuno nila pagpundo og tubig nga wala na may agas ang ilang mga gripo.

Bitaw. Daghan sa mga lugar sa Metro Cebu nga ilalum sa franchise area sa MCWD ang wala na gyu’y suplay sa tubig sulod na sa pipila na ka adlaw. Kini ilabina sa mga elevated areas diin dili na gayud makasaka pa ang tubig sa MCWD.

Gani bisan sa pipila ka lowland areas, hinay na gayud ang suplay sa tubig sa MCWD. Ug adunay higayon nga putolputol na ang agas sa tubig sa mga gripo. Mao nang dili na gayud malikayan sa mga konsumedor nga mag-alburoto.

Hinuon niangkon ang MCWD nga grabe na gayud ang pagkaubos sa suplay sa tubig niini. Hubas na ang duha ka dam - ang Buhisan Dam sa dakbayan sa Sugbo ug Jaclupan Dam sa dakbayan sa Talisay - nga ilang gisaligan.

Kinahanglan na gayud ang dakong aksiyon sa maong water district alang sa pag-improve sa suplay sa tubig niini. Salikwaot paminawon nga samtang nagkadako ang konsumedor sa franchise area niini, nagkulang usab ang suplay niini sa tubig, ilabina panahon sa summer.

* * *

Mura’g wala matarog si presidential candidate ug Davao City Mayor Rodrigo Duterte sa dakong bawod nga dala niadtong rape joke. Kini tungod kay padayon ang iyang pag-una sa mga survey.

Sa labing ulahi nga survey, misamot hinuon ang labaw ni Duterte batok sa iyang mga kaatbang alang sa piniliay sa Mayo 9. Nagpasabot ba kini nga hayag na ang kadaugan sa mayor sa Davao?

Hinuon alang sa mga supporter ni Duterte, klaro na ang kadaugan. Ug nga mokulit unya si Duterte og rekord sa kasaysayan nga maoy labing una nga presidente sa Pilipinas nga gikan sa Mindanao.

Of course, kun ma-maintain ni Duterte ang iyang labaw posible nga hayag na ang iyang kadaugan. Hinuon aduna pay usa ka semana nga paaboton ang iyang kampo.tubig