Kampanya na

Nagsugod na ang 90 ka adlaw nga opisyal nga pagpangampanya sa mga kandidato sa pagka presidente, bise presidente, senador ug party-list kaniadtong petsa 9 niining buwana. Apan ang dili opisyal nga pagpangampanya nagsugod na kaniadto pa’ng unang adlaw human nga sila milingkod sa ilang katungdanan human nga napili sa eleksyon sa miaging 2013.

Ang Commission on Elections nagpahinumdom sa mga kandidato sa dili paglapas sa patakaran sa eleksiyon aron dili sila masilotan.

Gipahinumduman usab sila sa dili pagbutang sa ilang mga campaign posters, streamers ug uban pa nga mga campaign paraphernalia gawas sa gitawag og “common posters area” nga itudlo sa Comelec.

Tuohan ba kaha ang Comelec sa mga kandidato ug sa ilang mga dumadapig? Dinhi sa ato, nagpasad lang sa lainlaing mga dapit ang campaign materials sa mga kandidato.

Ang uban niini gipangbutang na sa mga gidili sa Comelec. Karon ang Comelec ba ang mopahipos niini? Kinsa man ang pasakaan og kaso sa Comelec o silotan mahitungod sa campaign materials nga wala mabutang sa mga tukma nga butanganan? Ang mga kandidato?

Kining maong lagda lisud kaayo ipatuman kay gawas nga kuwang sa tawo ang Comelec, imposible usab nilang makit-an ang nagpapilit ug ang namutang niini.

Gawas seguro kun maoy basehan sa Comelec sa pagsilot ang pangalan sa kandidato nga gipapilit. Apan dili kini nila basta-basta nga mahimo tungod kay sayon ra kaayo sa kandidato ang pagpanghimakak pinaagi sa pagpasangil ug pag-ingon nga binuhatan kini sa ilang kaatbang sa politika. Sa laktod nga pagkasulti, kataw-anan ug inutil kining maong patakaran nga gustong ipatuman sa Comelec, apan wala gayud mapatuman.

Seguro mas mahimong epektibo kining maong patakaran kun ang mga tawo na mismo ang musilot niadtong mga kandidato nga dili mosunod og lagda. Kini pinaagi sa dili nila pagboto kanila.

Ang kandidato nga dili kamao mosunod og patakaran o balaod dili angayan nga iboto tungod kay masinupakon sila sa balaod. Kun sila misupak na sa balaod samtang wala pa mapili, unsa na kaha kun sila mapili na ug makakupot na og katungdanan.