EDITORYAL - Serbisyo uban ang pahiyom

Daghan ang nakahinuklog sa wali ni Arsobispo Jose Palma atol sa santos nga misa nga gipahigayon sa atubangan sa Cebu City Hall kagahapon dungan sa pagbalik na ni Mayor Michael Rama sa aktibong serbisyo.

Gipahinumdoman ni Palma ang mga kawani sa City Hall nga likayan gyud ang pagka mapahitas-on, ug angay sila nga magmapaubsanon sa ilang pag-alagad sa katawhan.

Tingali nakamatikod si Palma, o kaha nakadungog sa bagulbol sa ubang mga magbubuhis, nga kusmod-kusmoran sila sa mga kawani sa City Hall kun moduol sa ilang mga opisina alang sa ilang mga transaksyon.

Tukma gyud kaayo ang pagpahinumdom ni Palma ngadto sa mga kawani, ilabi na nga ang dakbayan sa Sugbo hapit na magsaulog sa iyang Charter Day karong Pebrero 24.

Isip mga kawani sa kagamhanan ug nagdawat og suweldo nga gikuha gikan sa buhis sa katawhan, ang mao nga mga kawani angay nga mapahiyumong moabi-abi sa ilang mga agawon – ang mga taxpayers.

Ang wali ni Palma wala lang gitumong sa mga kawani sa City Hall, kon dili, ngadto usab sa tanang kawani sa ubang ahensya sa kagamhanan ug mga local government units, ilabi na sa mga opisyal.

Dili ikalimod nga adunay pipila ka opisyal ug mga kawani sa kagamhanan nga kuwang og pag-abi-abi ngadto sa mga tawo nga makita nila nga dili nindot ang sapot nga isul-ob, lahi sa mga pustorawo kaayo nga moadto sa ilang mga buhatan.

Nindot unta kun ang wali ni Palma atubangan sa ubay-ubay’ng kawani sa City Hall nga mitambong sa ilang Family Day kagahapon, motuhop sa ilang kasing-kasing aron mapahiyumon na sila nga moabi-abi sa tanan nga moduol kanila.