Negosyo sa ilegal nga drugas

Pait hunahunaon kun tinuod man ang pasangil nga ang tibuok pamilyang Arquillano sa Barangay Campo sa lungsod sa San Francisco, Camotes sa amihanang Sugbo nalambigit sa negosyo sa ilegal nga drugas.

Ang makapasubo tungod kay ang inahan nga mao unta ang kahayag ug ang amahan nga maoy haligi ug pundasyon sa pamilya mao na hinoon ang nagpasiugda sa salawayon nga binuhatan.

Ang mas salikwaot kay ang inahan usa ka magtutudlo. Kun tinuod man ang pasangil batok sa tibuok pamilya, unsay matang sa values nga nahatag niining public school teacher nga si Maria Jocelyn Arquillano, una ngadto sa iyang mga anak ug ngadto sa iyang mga tinun-an?

Ang pasangil sa pagkalambigit ni Mrs. Arquillano sa negosyo sa ilegal nga drugas, dili labing unang higayon sa usa ka magtutudlo.  Daghan na sa mga magtutudlo ang nadakpan tungod sa paggamit sa ilegal nga drugas ug tungod sa pagsulod sa maong negosyo.

Makapasubo nga daghan na sa mga magtutudlo ang nagumon sa ilegal nga drugas. Samtang kusganong gihimakak sa magtiayon ang pasangil, ang mga ebidensya nga nakuha gikan nila dili ikapanghimakak. Kapin sa P2 milyones nga kantidad sa shabu ang nakuha.

Ang dili lang gyud nako masabtan ngadto sa mga tawo nga nalambigit sa ilegal nga drugas, tiggamitan ka man o namaligya niini, mao ang pagsugal sa klaro nga kapildehan sa imong maayong kinabuhi ug ugma.

Sa mga drug user, imong gihinayhinay sa pagpatay ang imong kaugalingon. Sa mga drug pusher ug dealers, liboan ka kinabuhi ang imong giguba ug gipatay!

Bugti ba sa usa ka maayong ugma ug sa kalig-on sa pamilya ang kuwarta sa hangin o sa panultihon sa atong katiguwangan, kuwarta nga pinaspasan?

Samtang tinuod makasina ang kasilaw sa kuwarta nga mahatag sa maong matang sa ilegal nga negosyo, apan wala na ba gyu’y konsensya nga nahibilin sa inyong kaugalingon sa dautang epekto nga inyong gisabwag?

Ang akong pangutana niining mga tawo nga nisud niining maong matang sa negosyo, makatulog ba mo nga maghayang? May kalinaw ba sa inyong pagpuyo? Tinuod ba gyud nga niasenso ang inyong pagkabutang o mas nigrabe pa hinoon ang inyong problema?

Tungod sa kadali ug kadagko sa kuwarta nga mahatag sa ilegal nga drugas, wala nay gustong magpatulo sa singot, mobugwal sa umahan, mangisda, o magtarong sa pag-eskuwela tungod kay ang pagnegosyo sa ilegal nga drugas maoy labing paspas ug dagko ang kita.

Dili ka panington sa pagbaligya niini tungod kay ikaw pay duolon. Sa maong negosyo, makasugod ka bisan wala’y puhonan. Wala usab kini magkinahanglan og mga gradwado sa kolehiyo ug labi pang wala’y gipiling edad.

Pait nga kamatuoran nga nagkinahanglan sa dinalian ug determinadong pagsanta.