Pilian ang mga Sugboanon

Pabiling nag-una ang Sugbo sa listahan sa mga probinsiya sa nasud nga adunay dakong populasyon sa mga botante. Gikan sa 2.5 milyones, misaka na ngadto sa 2.7 milyones ang mga botante sa lalawigan basi sa rekord sa Commission on Elections.

Nagpasabot kini nga ang Sugbo pabilin nga dakong battleground sa mga nasyonal nga kandidato. Ilabina karong umaabot nga eleksiyon sa Mayo diin magpili na usab kita kun si kinsa ang angayan nga modala sa renda sa atong pangagamhanan.

Sa nakalabay nga mga bulan, paborito nga destinasyon ang probinsiya sa mga nagtinguha nga mamahimong presidente sa nasud. Ug niining pagsugod unya sa kampanya, modagsa na usab matag adlaw dinhi ang mga national candidates.

Gani sa nakalabay nga mga adlaw, mibisita dinhi si Davao City Mayor Rodrigo Duterte ug ang runningmate niini nga si Senador Alan Peter Cayetano. Sila maoy unang mga kandidato pagka-presidente ug pagka-bise presidente nga midagsa sa Sugbo karon tuiga.

Sa pagka-senador, suki na si Leyte Rep. Martin Romualdez dinhi sa Sugbo. Halos matag semana ania siya. Tungod lagi kay usa siya ka Bisaya, nakita ni Romualdez ang dakong panginahanglan nga madani gayud niya ang mga Sugboanon.

Dako ang papel nga gikuptan sa Sugbo panahon sa bugnong lugaynon. Sa ako nang gikaingon kaniadto, mag-ilog gayud ang mga nasyonal nga kandidato pagkuha sa suporta sa mga Sugboanon tungod lagi sa kadaghan sa ilang mga boto.

Sa pagkakaron, wala pay kandidato pagka-presidente ang makaingon nga ila na ang mga botos sa mga Sugboanon. Puro pa lamang sila pakita dinhi sa pamasin nga makuha ang dakong suporta gikan sa lalawigan. Apan, bisan pa man kaniadto, wise kining mga Sugboanon pagpili og mga lideres sa atong nasud. Dili sila dali nga madani sa makabungol nga mga diskurso, sayaw-sayaw ug uban pang mga bulatik sa mga kandidato.     

Kadtong adunay maayong plataporma maoy adunay dakong tsansa nga suportahan sa probinsiya. Kini tungod kay naanad na ang mga Sugboanon pagbotar niadtong adunay maayong intensiyon pagdumala sa nasud.  O pilian ang mga Sugboanon. Mao nang bulawanon alang sa mga nasyonal nga kandidato ang suporta sa lalawigan.