PAGASA ug Google
Lahi sa bagyong Ruby sayo ning buwana, wa magkasungi ang forecast sa nagkalainlaing weather agencies sa Tropical Storm Seniang karon. Gani, ang Joint Typhoon Warning Center (JTWC) sa US Navy, nga nakasukod og mas kusog nga hangin nilang Yolanda ug Ruby, nibanabana og mas hinay nga hangin pagsugod ni Seniang (35 kilometers per hour) kay sa banabana sa PAGASA (45 kph).
Hinuon, samtang nagsuwat ko ini ug samtang nagsubay si Seniang sa ibabaw sa Bohol Sea human nibiya ug niggusbat sa Agusan del Norte, nalabwan na sab sa JTWC (92.6 kph) ang banabana sa PAGASA sa pag-unos ni Seniang (80 kph). Mas ubos sab ang direksiyon nga gitakda sa JTWC kay sa pasidaan sa PAGASA nga maigo ang habagatang Bohol ug habagatang Sugbo sa mata sa bagyo.
* * *
Nakapabisto hinuon sa dakong haw-ang sa forecasts sa PAGASA mao ang Google. Nga di nila kaatbang. Gani, ilang kaabag sa pagpakatap sa ilang weather bulletins sa mga bagyo nga makasud sa Philippine Area of Responsibility (PAR).
Wa maghimo ang Google og iyang kaugalingong forecast. Ni mopalihok sa iyang kaugalingong satellites ug mas gamhanang makinarya. Hinunoa, hingpit nga nagsalig sa kasayuran nga nahipos sa PAGASA gikan sa doppler radars ug ubang kahimanan. Apan nganong mas masabtan man ang website sa google.org kay sa opisyal nga website sa PAGASA (dost.pagasa.gov.ph)?
* * *
Labing dakong kalainan: Managlahi ang ilang mapa. Ang PAGASA nagsalig sa gamay ug karaang mapa sa Pilipinas, nga way ngan sa mga probinsiya. Ang Google Maps gipalihok sa bag-ong teknolohiya pagpadako ug pagliwag sa nagkalainlaing bahin.
Maong bisan ang forecasters sa PAGASA igo lang nihingan sa mas inilang mga dakbayan kay sa mas duol nga mga lungsod nga agian sa bagyo. Nga mao say sakit sa PhiVolcs--bisan asang lungsora sa Bohol ang epicenter sa linog ilang sukdon unsa kalayo gikan sa Tagbilaran City.
* * *
Mao nga ang PAGASA igo lang niingon nga si Seniang nibiya sa Agusan del Norte, ang Google Maps nitino nga niagi sa Nasipit ug Butuan City. Ang PAGASA igo lang nipasidaan nga si Seniang mo-landfall sa Tagbilaran, ang Google Maps nitumbok sa tungatunga sa Dauis ug Panglao nga posibleng sunod tugpahan.
Ang PAGASA niingon nga gikan sa Bohol si Seniang mahimong motugpa pag-usab sa Siquijor ug Dumaguete. Apan ang Google Maps nitino nga si Seniang mosud sa kabaybayonan sa Boljoon, molagbas sa Malabuyoc ug motabok sa tungatunga sa Manjuyod ug Bindoy, Negros Oriental. Sa ato pa, way problema ang kahimanan sa PAGASA, ang paghubad sa ilang kasayuran maoy kinahanglang palambuon. Nakapait mao nga ang Google nigamit sa kasayuran sa PAGASA apan ang PAGASA wa magtagad pagpahimus sa mga teknolohiya sa Google nga makahimo unta sa ilang forecasts nga mas sayon nga sabton.
- Latest
