Pait nga kalipay

Haskang paita ning makuratan ta, kalipay man gud nako maglakaw paingon sa Freeman Banat News opis diha sa bibong agianan sa Colon, dihang may mihudlat nako nga sigaon ug isogon og dagway. Misenyas nako sa pagsulod sa may 138 nga kan-anan. Naglingkod ning mitutok nako. “Sori Sirpons, ako bitaw to sa Sidlakan Center for PWD, didto sa may DSWD – nalimot na diay ka nako?

Medyo nahulipan sa kahinangop ang kakulba ko dihang siya na mismo ang miasoy sa tanan, aron ako mahinumdom. Dugay na kadtong panahon ug nabanhaw pagbalik kadtong kasinatian nga alang kanako, lisud mahimo niining tawhana ang kalalim sa kapait nga giantos kun may limitasyon pa siya sa pailob.

Magtiayon sila nga pulos may kakulian sa panglawas. Ang asawa niyang si Jessica maoy nagdumala sa Sidlakan Center diin gipanghatagan og paglaum nga mabuhing normal ang tanang mga pungkol, bakol, polio, bungol ug uban pang kakulian sa pagkatawo. Gibansay sila sa mga interesis nila nga kapanginabuhian. Ako’y gisakitang nagtan-aw sa ilang kahimtang. Linga kayo permi si Jessica sa iyang gimbuhaton, nga usa ka polio nga kanunay naglingkod sa wheelchair. Bisa’g nagping-it sa kalisud, moamag pa gyud ang pahiyom niya. Ang bana niya nga putol og tiil, mao poy tigtulod ug tigpahimutang nga bisa’g unsay buhaton, siya intawon ang monas ginhawa nga mopahigayon sa pinangga niyang asawa.

“Sir, patay na si Jessica.Wa mi kaamgo niadto nga hilabihan diay kapait sa kahimtang namo. Kay siya’y nagpabatyag kanako og kalipay luyo sa kapaitan.”