^

Sa lunhaw pa ang mga balili

Sugilanon - Prescil I. Cañete (Banat) - February 16, 2015 - 12:00am

Dili ko malimot ug labi pang dili ko mahikalimtan kadtong mga adlaw sa akong kabatan-on. Kadtong mga adlaw nga hupong sa kalipay uban sa akong mga kabata nga magdagan-dagan sa dakong patyo sa simbahan sa among lungsod panahon sa kahaponon sa berano.

Magtago-tago, magdakop-dakop nga usahay mangaligid sa lunhaw’ng mga balili. Inigka sawomsawom na, ilabi na inigbagting sa orasyon nga bagtingon ni Pelagio nga kampanero, mohunong mi sa pagdula ug maglumba’g panagan paingon sa paring puti nga lihero na kaayong mobinisaya, nagpaso-paso atubangan sa convento ug moamen sa iyang kamot sa pag-ingon: “Maayong gabii, Padre!” Ug motubag sab ang pari sa pag-ingon, “taga santo...taga santa anak!”

Makaila gyud ka nga pari kay nagsul-ob man og sotana. Lahi sa karon. Kun dili ka tigsimba maglisod ka pag-ila sa pari kay kasagaran nagkarsones o nagpurol lang. Wala na ang kampana sa simbahan sa among lungsod sa Cordova nga dala pa sa mga Katsila. Wala nay kampanero kay unsa pa may bagtingon? Hain na   kaha ang kampana? Nahulog sa linaw dayong katunaw?

Lain pa gyung ilhanan sa usa ka pari mao nga adunay pahak sa ulo dapit sa alimpulo. Karon, wala na. Ngano kaha? Kadako na’g kalainan. Kaniadto, magmisa ang pari magtalikod sa mga tawo. Karon mag-atubang na. Ngano kaha?

Kadako na’g kausaban. Wala na ang lunhaw’ng mga balili nga gipasad sa kinaiyahan sa dakong patyo sa simbahan nga kaniadto duwaanan sa mga bata. Karon gisemento na unya gikoral pa gyud og mga puthaw. Sa tunga gibutangan og duha ka net sa tennis. Maoy nagpasulabi sulod sa patyo ang dula sa tennis sa mga hamtong nga maglisod na gani paggukod sa bola. Paugnat sa kusog? Tingali. Apan nahikawan ang mga bata sa pagduwa-duwa sa dakong patyo. Maayo na lang unta kadto aron dili matental sa mga bisyo sama sa ginadiling druga ug sa gikagubtan nga cybersex nga mao na hinooy gikalingawan sa mga batan-on diin ang among lungsod sa Cordova maoy gitumbok nga cybersex capital sa tibuok kalibotan. Dungog? Apan dili ikapasigarbo, dili ikatungtong sa trono kay ang tawo o mga tawo nga nasayod moyamiid, modugwa sa kaluod nga dili gani makaon bisan sa mga iro ang kasalawayon sa maong buhat.

Naglulantaw ko sa palibot. Sa plaza publiko sa lungsod wala na ang kyosko sa kanhi niyang nahimutangan. Pila ba ka senador sa dalan nga Pilipinhon ang nakatungtong sa maong kyosko aron mopadayag sa ilang nga hunahuna ilabi na panahon sa election? Usa na si Sen. Jose W. Diokno, Sen. Serging Osmeña, Sen. Mariano Jesus Cuenco, kanhi secretary of Education Alejandro Roces, mayor  Cesar Climaco sa Zamboanga City ug daghan pa. Adunay sentimental value ang maong  kyosko. Apan karon, gibalhin na ang kyosko, anaa mora’g puting elepante nga naglubog kilid sa merkado publiko.

Igo na lang ako sa pagpanghipos ug pagpamunit sa mga tipaka sa kagahapon nga tipik na lang sa paghandum. Ang karon asoyonon pa, samtang ang ugma usa ka dakong pangutana. (Kataposan)

APAN CESAR CLIMACO CORDOVA EDUCATION ALEJANDRO ROCES JOSE W KARON WALA
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with