CCPO mopakatap og usa ka libo ka polis atol sa palaro
CEBU, Philippines — Moabot sa usa ka libo ka mga police personnel wala pay labot ang ubang law enforcement agencies ang gipanglantawan nga mobantay sa Palarong Pambansa 2024 karong buwan sa Hulyo nga himoon dinhi sa siyudad sa Sugbo.
Sigon ni Police Lieutenant Colonel Janette Rafter, Deputy City Director for Administration sa Cebu City Police Office nga modoble ang ilang security forces sanglit ang kalihukan apilan sa mga delagado gikan sa 17 ka Rehiyon sa Pilipinas.
Gipasabot hinoon ni Lt. Col. Rafter nga ang seguridad nga ilang gipatuman sa Central Visayas Regional Athletic Association (CIVRAA) nga gihulagway nga epektibo nagsilbing giya sab nila sa pagpatuman unya sa seguridad sa Palarong Pambansa 2024.
Giangkon ni Rafter nga dakong hagit nila ang Palarong Pambansa sanglit gipaabot nga moabot sa 20,000 ngadto sa 25,000 ka mga partisipante gikan sa nagkalain-laing rehiyon sa nasud ang moanhi sa Sugbo.
"Mao na gyud ang atong pinaka challenge diha ug kining the number of participants which we are expecting to more than double siguro considering nga this is Palaro", suma ni Lt. Col. Rafter.
Samtang ang Police Regional Office(PRO)-7 mipaneguro nga tutukan usab nila ang pagbantay sa seguridad sa Palarong Pambansa. Matud ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin nga usa sab sa gibantayan nila ang mopahimulos unya sa kahigayonan aron dili kini makaapekto sa Palarong Pambansa 2024.
Bantayan sab sa kapolisan ang mga tourist spots sa Central Visayas gumikan kay gipanglantawan nila nga ang pamilya sa mga atleta moanhi sa Sugbo aron mosuroy sa mga iladong laaganan sama sa mga beach resorts ug religious sites.
Ipasaka sab unya sa full alert ang status sa Central Visayas sa pagsugod sa Palarong Pambansa. (BANAT NEWS)
- Latest
