‘Manablahay’ gipatay
CEBU, Philippines — Patay ang usa ka 24-anyos nga lalake nga giingong nalambigit sa ilegal nga drugas human gipusil sa duha ka mga lalaki samtang naghuwat matud pa og tagak sa illegal nga drugas diha sa J.M Basa corner C. Padilla Street, Barangay San Nicolas Proper, siyudad sa Sugbo niadtong Miyerkules sa gabii, September 10, 2025.
Ang biktima mao si Vincent Payusan Alcazar, 24, nagpuyo sa Sitio Wakwak, Barangay Sawang Calero ning siyudad.
Una niini, alas 7 sa gabii niadtong Miyerkules ang Sawang Calero Police Station 6 nakadawat og tawag lang abot nahitabong shooting alarm sa maong dapit ug dali kining girespondehan sa kapulisan.
Pag-abot nila sa dapit ang biktima gidala dayon sa Miller Hospital apan gideklarar kining dead-on-arrival human makaangkon og daghang samad pinusilan sa lawas.
Sa impormasyon sa kapulisan ang biktima giingong nagbarug-barog sa maong dapit kay dunay gipaabot. Gituohan nga ilegal nga drugas ang gipaabot niya nga itagak, apan mga mamumuno ang nangabot.
Apan sumala pa sa nakuhang mga impormasyon sa kapolisan gikatahong kusog manabla sa halin sa drugas ang biktima ug gituohan nga may kalabotan niini ang nahitabo kaniya.
Gibutyag sa kapulisan nga aduna na silay Persons of Interest nga ilaha na karong gisubay.
Giingong bag-o lang niduwa sa illegal nga drugas ang biktma ug gi-monitor na kini sa mga operatiba. IBM BANAT NEWS
- Latest
