Retired CA justice ginganlan nga mastermind sa pagpatay

CEBU, Philippines —  Nisang-at og komento ang mga abogado ni retired Colonel Edwin Layese, kinsa maoy gihinganlan nga mastermind sa pagpatay sa Sugbuanong abogado nga si Atty. Joey Luis B. Wee nga mausab ang gisang-at nga kaso sa ilang kleyente ug mahimong accomplice o accessory sa krimen inay nga maoy principal.

Kini human ang Department of Justice (DOJ) prosecutors nga sila si Michael John Humarang, Susan Azaecon ug Richard Anthony Fadullon misang-at og motion nga nag-usab sa information sa kaso ug giapil si retired CA Justice Isaias Dicdican nga maoy principal uban ni Layese sa pagpatay kang Atty. Wee.

Sa ilang amended information nga gipetsahan og April 29, 2025 ang akusado nga si Layese ug Dicdican maoy nagplano sa pagpatay kang Wee niadtong Nobiyembre 23, 2020 sa ala 1:25 sa hapon dinhi sa dakbayan sa Sugbo.

Suma pa ang mga akusado nga sila si Layese ug Dicdican, adunay plano ug intension sa pagpusil patay nga gitabangan nila ni John Raymond Cabantao Suarez, Randy Benito Palparan, ingon man sa duha ka John Does ug sa usa ka Fausto Edgar Benigno Peralta ug ang kaso naka pending karon sa RTC Branch 14.

Sa pagkakaron si Layese lang ang napasakaan og kasong murder ug nabilanggo karon sa jail facility sa dakbayan sa Sugbo samtang si Dicdican pabiling at large kun gipangita.

Kahinumduman ang Supreme Court pormal nga nipasaka og kaso nga gross misconduct batok ni Dicdican gumikan sa giingong kalambigitan niini sa pagpatay kang Wee.(BANAT NEWS)