123 ka frontline workers sa siyudad sa Sugbo pasidunggan

CEBU, Philippines — Giuyonan na sa Konseho sa dakbayan sa Sugbo ang paghatag og pasidungog sa 123 ka mga frontline workers sa kagamhanan sa siyudad.

Lakip usab sa pasidunggan sa Cebu City Government atol sa Kakugi Awards 2025 karong Sabado, Mayo 3, 2025 mao ang 160 ka barangay personnel gikan sa 80 ka mga barangay sa Cebu City.  Nasayran ang konseho sa siyudad sa Sugbo nigahin na og P1.6 million alang sa awarding ceremony.

Ang Cebu City Government nihatag na og pasidungog sa ubang mga kawani niini atol sa Charter Day celebration niadtong buwan sa Pebrero.

Apan sigon ni Cebu City Mayor Raymond Alvin Garcia nga dugang tarong ug matinud-anon nga kawani ang angayan nga pasidunggan usab sa kagamhanan sa siyudad. "Lain na sad matinud-anon ug tarong ba, maghatag gyud ta og pasidungog ana nila, ato gyud na hatagan og pasidungog", matud ni Mayor Garcia.

Ang paghatag og pasidungog sa 123 ka frontline workers gipahaom usab sa pagsaulog sa siyudad sa ika-123 nga labor day sa nasud karong Mayo 1.  MEL BANAT NEWS