12-anyos, hitman nadakpan

CEBU, Philippines — Na-rescue sa kapulisan sa Mambaling Police Station 11 Cebu City Police Office ang usa ka 12 anyos nga batang lalaki ug nadakpan ang hamtong nga kauban niini atol sa ilang operasyon sa Barangay Mambaling, siyudad sa Sugbo sa miaging gabii.

Ang na-rescue nga 12-anyos tinun-an sa Grade 6 nga taga Tupaz Street, Barangay Sawang Calero ning siyudad.

Samtang ang nadakpan mao ang ex-convict nga si Gilbert Cabanes Cabarrubias, 23 anyos, nga silingan sa bata ug giingong miyembro sa gun-for-hire.

Si Cabarrubias nakuhaan og kalibre .38 nga armas nga dunay duha ka bala samtang ang menor de edad nakuhaan og unom ka stick nga marijuana.

Nasayran ang kapulisan sa Mambaling Police Station nagpahigayon og foot patrolling sa dapit isip kabahin sa ilang Oplan Hipos.

Didto naaktuhan ang menor de edad nga nagdala matud pa og nilikit nga marijuana samtang si Cabarrubias nakuhaan og armas.

Sa imbestigasyon sa Mambaling Police Station si Cabarrubias giingong napriso na kaniadto sa kasong murder.

Gi-recruit matud pa niini ang menor de edad sa mga illegal nga kalihukan.

Kasong kalapasan sa Republic Act 10591 ug COMELEC Gun ang kaso ni Cabarrubias samtang ang menor de edad gitugyan sa kapulisan ngadto sa DSWD.

Sa laing bahin, agresibo sab ang kapolisan sa Dakbayan sa Talisay sa ilang kampanya kontra tanang matang sa krimen pinaagi sa pagsita sa mga tawo nga ilang mamatikdan nga kadudahan ang mga lihok subay sa programa nga Oplan Bakal Sita.

Matud pa ni Police Lt. Col. Epream Paguyod, hepe sa kapolisan sa Talisay nga pinasubay kini sa programa sa kapolisan agi og suporta sa Commission on Election (COMELEC) gun ban.

Ilaha sab nga gibadlong ug gipauli sa ilang mga panimaay ang mga menor de edad nga naglaroy-laroy pa sa lawom nga kagabhion.

Gipasabot ni Paguyod, kadtong mga kadudahan kaayo og mga lihok mao ray ilang pang-sitahon ug kapkapan.

Nagtuo sila nga usa kini ka matang sa pagsanta sa krimen una pa kini mahitabo. —Gabriel Bonjoc, IBM  BANAT NEWS