Nasunogan sa brgy Basak nakadawat og tabang pinansyal

CEBU, Philippines — Nakasinate ug kalisud sa ilang pagpuyo ang mga molopyo sa upat ka sitio sa barangay Basak dakbayan sa Mandaue tungod sa sunog nga miigo sa ilang lugar.

Apan bisan pa sa ilang kahimtang sila gidasig ni Mandaue City mayor Jonas Cortes nga dili magpakawala sa paglaum nga sila makabangon pinaagi sa "Tabang Mandaue Program" nga iyang gipasiugdahan.

Gihatagan sa mayor og financial assistance ang mga nasunogan sa Barangay Basak.

Pinaagi sa “Tabang Mandaue Program” nakadawat og tag P10,000 nga cash assistance ang 73 ka pamilya nga totally damage ang ilang mga panimalay subay sa pakisusi nga gihimo sa City Social Welfare and Services Office.

Samtang tag P5,000 usab ang nadawat sa 24 ka pamilya nga biktima sa sunog nga mga renters ug sharers sa ilang pagpuyo sa maong lugar.

Kauban sa mayor sa paghatag sa financial assistance ngadto sa mga biktima sa sunog mao ang mga city councilors nga sila si Maline Cortes-Zafra, Jimmy Lumapas, ug Oscar del Castillo ug gikuyogan usab sila sa mga opisyal sa barangay Basak. (BANAT NEWS)