Garganera mipasalig nga makahimo ra sa tahas nga gisangon kaniya

CEBU, Philippines — Konsehal Joel Garganera sa Dakbayan sa Sugbo nipasalig nga dili ra siya maglisod sa gihatag kaniya nga tahas ni acting mayor Raymond Alvin Garcia nga mao ang magbalantay sa Cebu City Disaster Risk Reduction and Management Office tungod kay kanunay man ang iyang pakig-alayon sa maong buhatan.

Matud pa ni Garganera, dili lisod kaniya ang maong buhatan ilabi na siya ang pangu sa konseho sa Committee on Climate Change Adaptation, Disaster Risk Reduction and Management, Safety hinungdan aduna silay kanunay nga panagtagbo sa CDRRMO.

Dugang pa niya nga dili na kini bag-o alang kaniya ilabi na nga nahimo usab siya nga Chief Implementer sa Emergency Operations Center panahon sa covid-19.

Maoy gusto sa konsehal nga ang naa sa grounds maoy mopadangat sa ilang mga panginahanglanon kay sila sa konseho igo ra mopanday sa mga balaod subay sa ilang kinahanglanon.

Sa nasayran niadtong flag raising sa Cebu City Hall si Garcia nitudlo sa mga konsehal nga maoy magbalantay kun overseer sa pipila ka mga department sa City Hall diin usa na niini si Garganera. (BANAT NEWS)