Mananga River sa Talisay gipaubos sa desilting

CEBU, Philippines — Gisugdan na ang desilting ug paglimpiyo sa Mananga River sa Siyudad sa Talisay aron modagha ang tubig sa maong sapa human nga nihubas kini tungod sa grabeng kainit dala sa El Niño.

Ni-contact ang Kapitolyo og unom contractor aron mokubkob ug molimpiyo sa maong sapa.

“The water is trapped underneath because there has been absolutely no desiltation all these decades”, matud ni Gobernador Gwendolyn Garcia kinsa nidugang nga ang mga dagkon g bato ug yuta maoy nakababag sa agas sa tubig sa maong sapa.

Gihangyo sa Kapitolyo ang Environmental Management Bureau nga mopadala og representante sa proseso sa desilting aron malikayan nga adunay kalapasan sa environmental law sa habig sa contractor.

Gawas sa Mananga, ang Lusaran River apil usab nga limpiyohan aron madugangan ang suplay sa tubig.

Bisan ang Luyang river sa Lungsod sa Carmen ang gipaubos usab sa desilting aron makapaagas pa og tubig.  Ang tulo ka mga sapa maoy kuhaan og tubig sa Metropolitan Cebu Water District (MCWD) aron pagsuplay sa demand sa mga lungsod ug siyudad sa Metro Cebu. — /BDB (BANAT NEWS)