Nagduma sa BRT gidapit pagpresentar sa bag-ong feature sa proyekto

CEBU, Philippines — Giimbitar karon ang management sa Cebu Bus Rapid Transit (CBRT) alang sa usa executive session aron opisyal nga ipresentar ang desinyo sa pinaka uwahing feature sa BRT nga gitawag og Link to the Port Urban Realm Enhancement nunot sa ilang suwat nga nangayo og “no objection” resolution.

Mao kini ang giaprobahan nga resolusyon sa konseho nunot sa suwat nga gipadala ni Engineer Norvin Imbong, CBRT Project Manager nga nangayo og komento sa Cebu City Council ug “No Objection” sa maong kalambuan.

Kini nga sulat naka address ngadto kang Acting Mayor Raymond Garcia ug gi-endorso ngadto sa konseho sa dakbayan atol sa regular session niadtong Miyerkules, Mayo 15, 2024.

Giimbitar sa Cebu City Council ang project manager sa BRT, ang Cebu City Transportation Office (CCTO), mga business establishment owners nga maapektuhan sa mga lugar sa Osmeña Boulevard gikan sa P Del Rosario hangtod sa Plaza Independencia, Basilica Minore del Santo Niño management alang sa usa ka executive session.

Ang sesyon gikatakda sa Hunyo 13, 2024.

Sa suwat ni Imbong, gitumbok nga ang maong feature mao ang pag develop sa pedestrian mobility gikan sa P. del Rosario St. paingon sa Plaza Independencia sa Osmena Boulevard. Ang scope sa trabaho niini naglakip sa pagpalapad sa sidewalk (labing menos 1.5m) gamit ang pavers block, installation sa Bike lane (1.5m), intallations sa Streetlights, ug installation sa Plant box o Planting strips.

Sa giplanohan nga mga bahin niini nga nalakip sa session agenda, giingon nga ang Link to the Port usa ka bahin sa package 1. Giingon nga ang koneksyon mamahimo pinaagi sa pampublikong transportasyon, bike lane ug pedestrian boulevard.

Nasuta sab niini nga ang maong lugar "pedestrian-oriented". Giingon usab nga kini adunay taas nga potensyal alang sa urban renovation gikan sa pedestrian transit areas hangtod ngadto sa building rehabilitation.

Ang tumong sa Link to the Port mao ang pagpauswag sa kalidad sa syudad sa karaang downtown ug pagdani sa mga turista. Gawas niini, tumong usab niini nga mahatagan og transport services ang pantalan nga makatabang sa mga commuters ug turista nga maka-access o makaabot sa ubang destinasyon sa siyudad. — /MEL (BANAT NEWS)