Rama ug ubang opisyal wa pa kadawat sa suspension order

CEBU, Philippines — Nagpabilin nga normal ang operasyon sa Cebu City Hall kagahapon, Huwebes taliwa sa gipahamtang nga preventive suspension batok ni Cebu City mayor Michael Rama ug sa laing pito ka mga opisyal.

Ang City Administrator Atty. Collin Rosell, usa sa gipahamtangan sa preventive suspension wala pa usab mohatag og komento kay wa pa sila kadawat og kopya sa suspension order.

Sumala pa ni Rosell, magpaabot pa gayud sila kung unsa ang kinatibuk-an nga kaso tungod kay dili man sila maka trabaho niini kay wala man silay nadawat nga papel ug padayon ang ilang trabaho sa City Hall.

Si mayor Rama una nang nipadayag nga wala pa usab siya makadawat sa kamandoan ug gisalig na niya sa iyang mga abogado ang tanan.

Samtang nakugang si Vice Mayor Raymond Alvin Garcia sa gihulagway nga kalit nga panghitabo.

Ang Vice Mayor andam matud pa siya sa paghimo sa iyang responsibilidad kon siya na ang matudlo nga modumala sa dakbayan sa higayon nga mapatuman na ang suspension order.

Gipasabot niini nga ang order sa Ombudsman kinahanglan nga ipatuman sa Office of the Secretary of the DILG. Sa higayon nga aduna nay notice nga mapagawas, mao na kini ang higayon nga mo take effect ang suspension.

Ang Vice Mayor atoa karon sa kaulohan alang sa iyang nahiuna nga kalihukan nga tambongan.

Samtang ang buhatan sa DILG wala pa usab makadawat sa kopya sa suspension order may kalabutan sa implementation niini.

Managlahi usab ang reaction sa mga tawo bahin sa maong suspension order sa mayor diin suma pa ni Jasmin Baclayon nga nasubo siya sa gidangatan sa mayor nga giila nga amahan sa dakbayan ug wala man silay mahimo niini hinungdan nga ilakip nalang kini niya sa pag ampo.

Sa dihang nahinabi sa The Freeman ang usa sa mga reklamante nga si Sybil Ybañez, kini miingon nga silang upat ka complainant ang gipa leave una sa trabaho human sa giingong komprontasyon tali sa usa ka supporter ni mayor Rama diha sa City Hall.

"Gahapon (Wednesday), gisulong ko sa usa sa supporter ni mayor, ngano daw giapil si mayor," suma pa ni Ybañez. (BANAT NEWS)