Miyembro og drug group nadakpan

CEBU, Philippines — Nadakpan ang usa ka 22-anyos nga lalake nga gitumbok nga miyembro matud pa og drug group atol sa buy-bust operation sa Philippine Drug Enforcement Agency (PDEA)-7, NAVFORCEN, PNP-DEG SOU, RPDEU-7 ug Carcar City Police Station sa Sitio Lower Dakit, Barangay Perrelos, sa Dakbayan sa Carcar sa miaging gabii.

Ang suspetsado mao si Dave Tanga-an, usa ka room boy ug residente sa naasoy nga barangay nga nakuhaan og 100 grams nga gituohang shabu nga nagkantidad og P680 mil, buy-bust money, cellphone ug ubang non-drug evidence.

Sa laing operasyon, nadakpan sab sa buybust operaion sa kapolisan sa Presinto 5 sa Lapu-Lapu City ang usa ka multicab drayber nga nakuhaan og ilegal nga drugas og armas sa Barangay Bankal niadtong Huwebes sa tungang gabii.

Si Police Major Ramil Dugan, hepe sa Presinto 5 sa LCPO miingon nga nakahipos sila og impormasyon nga ang suspetsado kansang pangalan wala nila ibutyag maoy tigbaligya og shabu sa mga street level nga drug pushers sa lugar.

Nakuha gikan sa maong dinakpan ang tulo ka gramo nga nagkantidad og P15mil.

Nasakmit usab gikan niya ang kalibre .38 nga dunay mga bala.

Samtang dul-an sab sa tunga sa milyon ka pesos nga shabu ang nasakmit gikan sa duha ka durugista sa operasyon sa kapolisan diha sa Purok Gabison, Barangay Lagtang, Dakbayan sa Talisay niadtong Huwebes sa gabii.

Ang subject sa operasyon mao si Christian Roble Pinat alyas Peanut, 48, nagpuyo sa maong lugar. Samtang ang iyang kauban mao si Junnifer Socias Poncol nga taga Barangay San Roque.

Ang mga operatiba pinangulohan ni Police Lt. Col. Epream Paguyod nihimo sa pakigsabot ni Peanut aron ila kining malit-ag.

Sa dihang misanong kini sa laang, gidiretso kini og dakop ug nakuhaan og 60 gramos nga gibana-bana nga balor nga P408 mil.

Ang mga dinakpan gibalhug sa bilangguan nga gikatakdang pasakaan og kaso. -,Decemay P. Padilla ug Gabriel Bonjoc/IBM BANAT NEWS