Probinsiya sa Sugbo makadawat og P36 milyon gikan sa PAGCOR

CEBU, Philippines — Makadawat og P36 milyones ang Probinsiya sa Sugbo gikan sa Philippine Amusement ang Gaming Corporation (PAGCOR) matag tuig subay sa gilatid nga share o gahin sa probinsiya gikan sa kita sa maong ahensiya.

Ang mga opisyal sa PAGCOR Cebu Office nibisita ngadto kang Gobernador Gwendolyn Garcia niadtong Abril 22, 2024 aron i-turnover ang gahin sa Probinsiya sa Sugbo.  Ang PAGCOR usa ka government-owned ug controlled corporation nga maoy nag- regulate ug nag-operate sama sa mga land-based casinos, online casinos, bingo, electronic games, slot machines ug ubang matang sa gambling subay sa balaod o sa Presidential Decree No.1869.

Gipahibalo sa branch manager sa PAGCOR Cebu Pedro Michael Cendaña IV ngadto kang Garcia nga giumentohan og tag P3 milyones ang binuwan nga gahin sa Cebu Provincial Government diin nikabat na ngadto sa P36 milyones matag tuig.  Sa tibuok nasud ang Sugbo maoy ikaduha sa adunay pinakadako nga operasyon sa PAGCOR.

Ang gahin sa Kapitolyo gikan sa PAGCOR gamiton alang sa mga programa niini sama sa imprastraktura ug social amelioration program. BDB BANAT NEWS