Dakung alkanse nasinati sa mag-uuma sa bukirang barangay

MANILA, Philippines — Daku na kaayo ang alkanse sa mga mag-uuma sa bukirang bahin sa dakbayan sa Sugbo tungod sa epekto sa El Niño diin usa nila naka obserba na og dili mumenos usa ka milyon na ang ilang alkanse.

Si Emilio Secretaria, usa ka mag-uuma nga nanag-iya og dili mominos upat ka ektarya nga umahan sa Barangay Sudlon 2, mipahibaw nga sila manghatag og libreng kamatis niadtong Sabado, Abril 21, 2024.

Mao usab kini ang gipahibawo ni Cebu City Councilor Pastor “Jun” Alcover, Chairman sa Committee on Agriculture sa konseho sa dakbayan kinsa mipadayag sa kahimtang sa mga mag-uuma taliwala sa huwaw.

Si Secretaria niatubang sa media aron ipakita ang kadaut nga namugna sa huwaw ngadto sa ilang pananum sugod sa buwan sa Marso ning tuiga. Iyang giangkon nga kapin sa usa ka milyon ang ilang naobserbahan nga income loss tungod sa epekto sa El Niño taliwala sab sa krisis sa tubig.

Dugang pa niya nga kapin sa P800,000 nila nga gasto, P300,000 lang ang nauli diin adunay 500,000 nga nawala sa ilang puhunan.

Sa pag-abot sa Marso, si Secretaria niingon nga wala nila damha ang massive heat wave ug naghunahuna nga kini normal nga init nga dala sa summer season apan pag-abot sa Abril, nabantayan na nila ang epekto sa huwaw sa dihang paspas nga nihubas ang ilang kaugalingong water impounding.

Sa bahin sa tabang sa gobyerno, si Secretaria niingon nga nakasabot sila kung naglisod ang gobyerno sa paghatag og hinabang kanila.

“Pero sa akoa isip mag uuma, ang need nako katong di nako maabot, pananglitan kanang mag provide or pag located anang mga scanners, asa dapit ang kusog na tubod, wala man tay kahimanan ana isip mag uuma,” matod ni Secretaria.

Gawas niini, gihangyo usab niya ang kagamhanan sa dakbayan nga tabangan sila sa pag-drill sa tinubdan sa tubig o tugotan sila nga makahulam og mga ekipo sa paghimo niini.

Hinuon si Secretaria niingon nga ang Department of Agriculture sa Rehiyon 7 naghatag og tabang aron masustiner ang ilang pagpanguma sa niaging mga tuig. 

Gidugang usab niya nga karong tuiga, wala pa sila makadawat bisan unsang tabang gikan sa gobyerno. (BANAT NEWS)