50 mil cubic meters nawagtang nga supply sa tubig sa MCWD

CEBU, Philippines — Niabot ngadto sa 50 mil cubic meters matag adlaw ang nawagtang nga supply sa tubig sa Metropolitan Cebu Water District (MCWD) tungod sa inanay nga paghubas sa tinubdan lakip na ang mga surface water.

Kini ang gibutyag sa tigpamaba sa MCWD Minerva Gerodias nga nahinabi sa mga tigbalita.

Matud ni Gerodias katunga nalang sa gidaghanon sa tubig ang nahibilin sa mga surface water source sama diha sa Barangay Jaclupan, Dakbayan sa Talisay nga kaniadto adunay 30 mil cubic meters apan karon 14 mil cubic meters nalang, Barangay Buhisan sa Dakbayan sa Sugbo nga kanhi 6 mil karon 3 mil cubic meters nalang matag adlaw.

Si Gerodias nagkanayon nga adunay usa ka source sa Lungsod sa Compostela ang wala na gyu’y makuha nga tubig tungod kay nauga na ang sapa nga gikuhaan niini.

Samtang ang Lusaran nga maoy usa sa gisaligan nga tinubdan sa tubig katunga nalang ang na-deliver hinuon aduna pay tinubdan sa Lungsod sa Carmen nga dili kaayo apektado sa El Niño ang ilang nakuhaan og gani nidugang sila og palit og 5 mil cubic meters ug anaa pa ang underground water sources.

Gipahibalo ni Gerodias nga ang MCWD nipatuman og water delivery service sa mga barangay sa ilang franchise area nga nihit o wala nay makuha nga tubig nga gilangkuban sa mga barangay sa Umapad, Opao, Alng-alang, Looc, Mandaue market/Looc, Subangdaku sa Dakbayan sa Mandaue.

Samtang sa Dakbayan sa Sugbo diha sa Imus, Binaliw, BJMP, San Jose/Talamban ug Tapoko samtang sa Dakbayan sa Talisay diha sa Rabaya ug Cansojong.

Ang maong mga dapit hatdan sa MCWD og tubig upat ka higayon sa usa ka adlaw.

Gipasalig sa MCWD nga padayon ang ilang pagserbisyo sa mga konsumidor niining panahon sa huwaw bisan pa sa mga isyu nga nitumaw sa ilang buhatan. (BANAT NEWS)