Drayber ug Move It mohatag og hinabang

CEBU, Philippines — Nakagawas na gikan sa custodial facility sa Traffic Enforcement Unit sa Cebu City Police Office ang driver sa SUV nga si Dominador Duyongan nga apil sa nahitabong disgrasya sa may viaduct padung sa South Road Properties (SRP) sa miaging adlaw nga mikalas og duha ka kinabuhi.

Kahinumduman nga usa ka motorsiklo ug SUV ang nalambigit sa maong disgrasya diin ang driver sa motorsiklo nga si Brian James Liva Pedrosa Bayarcal ug ang pasahero niini nga si Chlea Jane Coronel Gomez patay diha-diha dayon.

Matud pa nadasmagan sa center barrier ang motor sa duha maong sila nangalagpot ug napadung sa SUV.

Gibutyag hinuon sa TEU CCPO nagkahusay na matod pa ang pamilya sa drayber ug pasahero niini sa pamilya sa SUV driver nga di na sila mosang-at og kaso.

Sa pakighinabi sa Banat News kang Dominador kini miingon nga wala siya makabantay sa motorsiklo ug kalit nalang nga naay nilagubo kilid sa iyang sakyanan.

Adtong higayona paingon unta sila sa Pier 3 kay ihatod niya ang paryente sa iyahang misis nga mouli sa Probinsiya sa Bohol.

Matud ni Dominador nga bisan og dili siya ang nakasala sa maong hitabo mohatag siya og gamay nga hinabang sa pamilya sa mga nakalas nga mao ilang nasabutan sa iyahang pamilya.

Nasayran nga si Dominador kanhi sakop sa Bureau of Fire Protection ug niretiro kini niadtong tuig 2019.  Ang driver sa motorsiklo konektado sa Move It nga usa ka motorcycle riding app .

Ang Move It mipagawas og opisyal nga pamahayag labot sa maong panghitabo apil na ang pagpaabot sa ilang pahasubo sa pamilya sa ilang rider ug sa pasahero.

Sigon nila nagpadala dayon sila og response team sa nahitaboan sa disgrasya aron makahatag og suporta ug dinaliang tabang.  Hugot sab ang ilang pakig-alayon sa mga apektadong pamilya, dunay ayuda nga gihatag pinaagi sa ilang insurance policies ug support programs.

Furthermore, MOVE IT is in close coordination with the local law enforcement agencies to aid in their investigation. Our thoughts and prayers are with the families. We will ensure they receive the full support they need during this time,  tipik sa pamahayag sa Move It. (BANAT NEWS)