CCPO niawhag nga dili biyaan ang mga gagmay ng bata

CEBU, Philippines — Giawhag sa Cebu City Police Office (CCPO) ang mga ginikanan ug kadtong gisaligan nga magbantay og mga bata ilabi na mga gagmay pa nga bantayan kanunay ug dili biyaan nga mag-inusara aron malikayan ang disgrasya.

Ang maong panawagan sa kapolisan sa Siyudad sa Sugbo gumikan kini sa nahitabong insidente sa niaging adlaw diin usa ka 4-anyos nga bata ang nakalas human natagak gikan sa ika-27 nga andana sa condominium diha sa La Guardia extension, Barangay Lahug, Siyudad sa Sugbo ug nitugpa sa canopy sa third floor.

Matud ni Police Lieutenant Colonel Janette Rafter, deputy city director for operations sa Cebu City Police Office (CCPO) nga ang mga bata nga 10-anyos paubos bantayanan pa kaayo kini.

Dapat gyud kining mga bataa especially at the age of 5 or below 5 years dapat naa gyud na always under our watchful eyes kasi mao ning mga bataa ang curious gyud kaayo , matud ni Rafter.

Nasayran nga padayon ang imbestigasyon sa kapolisan sa Siyudad sa Sugbo kalabot sa hitabo.

Nasayran usab nga ang Office of the Building Officials (OBO) sa Siyudad sa Sugbo nihimo og pakisusi sa condominium kagahapon. (BANAT NEWS)