Osmeña: Kuyaw ma-blacklist ang Cebu City

CEBU, Philippines — Si kanhi Cebu City mayor Tomas Osmeña nisaway sa mga panawagan sa pagpahunong sa pag-ugmad Cebu Bus Rapid Transit sa Osmeña Boulevard, matud niya dili kini ikahimuot sa nasudnong kagamhanan tungod kay ang proyekto naglambigit og international treaty.

Matud niya posibleng ma-blacklist sa mga donor ang Pilipinas. Ang CBRT gitabangan og pundo sa Japan, England ug Germany.

“You are asking for trouble, never mind if you are asking trouble for yourself, but it is the people who will suffer. These are some of the things that I have to talk about because we have leaders that are acting like spoiled brats,” matud ni Osmeña.

Si Osmeña nipatawag og press conference kagahapon aron pahibaw-on ang publiko bahin sa CBRT.

Ang kanhi mayor nipahinumdom nga ang Bohol gi-blacklist sa kagamhanan sa Japan dihang dunay mga Japanese engineers nga gikidnap sa pipila ka sakop sa NPA sa isla.

Matud niya 15 ka tuig una nakasulod og laing proyekto ang mga Hapones sa Bohol. Si Osmeña niingon nga nag-amping ang Dakbayan sa Sugbo sa pagdumala sa mga proyekto uban sa mga Hapon.

Si Osmeña miingon nga dugay ng katambayayong mga proyekto sa dakbayan ang Japan, nahunong lang kini sa dihang si John Henry “Sonny” Osmeña mikwestyon sa maong partnership.

“Ever since that time, we had nothing,” matud ni Osmeña.

Tungod niini, nabalaka siya aning pagpahunong sa pagpadayon og trabaho sa CBRT.

Gitataw ni Osmeña nga kining mga donor nations motimbang-timbang sa mga nasud nga adunay reputasyong “bad creditors.”

“I know that the Philippine government will not going to spoil their international credit rating because of what Councilor Cuenco and some crazy Provincial board members starts echo-tripping and say we should stop the CBRT,” sigun pa ni Osmeña.

Dugang pa niya, ang BRT dili lang gipundohan sa World Bank kun dili gipundohan sab sa French Government.

Matud ni Osmeña, ang kasamtangang issue sa CRBT makaapektar sa umaabot nga mga proyekto alang sa dakbayan sa Sugbo.

“Why do we behave like that? Why do we behave like as if we owe them and that they have to give it to us, they do not have to give it to us,” matud ni Osmeña.

Sa miaging buwan, si Cebu City Councilor James Anthony Cuenco mipadayag bahin sa iyang baruganan sa CBRT project ug miawhag nga hunongon una ang pagtrabaho sa packages 1 ug 2 samtang wala pay resolusyon bahin niini.

Matud sa kanhi mayor, bisan nalang unta og gamay nga respeto gikan sa konsehal. “Walang bastosan, they are acting like they know it all,” matud niya.

Si Osmeña mihulagway sab “absurd” ang rason sa Hunta Probinsiyal pagpahunong sa CBRT tungod kay wala tukora ang CBRT aron gub-on ang Capitol Building.

 “And then what do they have to offer? Nothing,” dugang pa niya. Giangkon niya nga dili gyud perpekto ang CBRT apan maestoryahan ra kini.

Sa pikas bahin, giendorsa ni Mayor Michael Rama si Atty. Kent Francisco Jongoy nga maoy modumala sa proyekto sa CBRT.

Ang endorsement ni Jongoy, gipahibalo ni City Administrator Collin Rosell, atol sa gipahigayon nga flag raising ceremony sa mga empleyado sa city hall, lunes sa buntag.

Sumala pa ni Rosell, giindorso ang pangalan ni Jongoy ngadto sa buhatan sa DOTr isip maoy modumala sa nagpadayon nga CBRT ug magpabilin usab kini isip assistant department head sa Road Management Authority.  IBM BANAT NEWS