“Ecstasy” gilamoy sa motorista

CEBU, Philippines — Gitanggong ang usa ka 34-anyos nga lalaki nga gidakop tungod matud pa iyang gipatiran ang team leader sa mga sakop  sa Special Weapon and Tactics (SWAT)  sa Lapu-Lapu City Police Office (SWAT) diha sa police checkpoint kay gisita kini sa mga polis.

Si Police Lieutenant Colonel Christian Torres,  pangulo  sa City Investigation Detection and Management Unit (CIDMU) ug tigpama sa LCPO miingon nga ang dinakpan ilang pasakaan og kaso nga Direct Assault Upon Agent in Person s of Authority ug ingon man kalapasan sa Article 151 of RPC.

Matud pa ni Torres nga alas-12 pasado sa tungang gabii sa miaging Biyernes Marso 1, 2024, ang mga sakop sa SWAT sa LCPO ang nagpahigayon og checkpoint sa dalan sa Barangay Babag  sa maong siyudad.

Ang tanang mga nagmotor gipahunong aron susihon ang mga driver’s license ug reshitro sa ilang mga motor.

Apan ang suspek matud pa nag-ukon ukon sa paghunong maong gipugngan. Apan gikatahong nangisog kini ug mikisikisi sa dihang gikuptan sa mga polis, ug gipatiran ang team leader nga si Police Lieutenant  Roland Mellior.

Gikataho sab nga atol sa komosyon, nakita kining dunay gikuot sa bulsa nga plastic sachet nga gituohang ang sulod ecstasy pill dali-dali niining gisulod sa baba ug gitulon.

Si  Torres miingon nga tungod sa paglamoy sa gituohang ebidensiya, kasong direct assault ug resisting arrest lang una ilang mapasaka batok niini. (BANAT NEWS)