P77 milyong shabu ang nakumpiskar sa kapolisan sa Bohol
CEBU, Philippines — Ubay-ubay na nga ilegal nga drugas ang nasakmit sa kapulisan sa Bohol Police Provincial Office (BPPO) sulod lang sa buwan sa Enero ug Pebrero karong tuiga.
Sa datos aa BPPO niabot sa 11,343.68 gramong ilegal nga drugas ang nasakmit, kini gilangkuban sa 1,209.58 gramos sa buwan sa Enero ug 10,134.1 gramos sa buwan sa Pebrero. Ang tanan niabot og P77. 1 million.
Matud sa tigpamaba sa Bohol Police Provincial Office Lieutenant Colonel Norman Nuez nga posibleng agianan sa suplay sa drugas ang probinsiya kay nag-atubang sa ubang lugar ang ilang isla.
Giklaro nga wala'y shabu laboratory sa Bohol apan dunay mga gitawag nga bodegero nga tighupot sa mangabot nga supply sa illegal nga drugas para ipangapud-apod.
Gibutyag ni Nuez nga dihang gihimo ang Oplan Tokhang niadtong tuig 2016 nakatalaa og 39,700 drug personalities sa tibuok probinsiya.
Apan naa lang sa kapin 7,000 ang nakakumpleto sa drug rehabilitation, samtang duna pay 16,000 nga padayon sa community based drug rehabilitation program.
Matud ni Nuez, nga gitutokan dili lang supply reduction kondili apil na ang demand reduction.
"Mao na ang campaign nato not only in the supply reduction strategy but on the demand reduction strategy so nag conduct tag symposium, mga IEC campaign sa mga eskwelahan, sa mga kabarangayan para ma inform nato ang kabataan sa ill effects of illegal drugs, unsay sabot nila aron malikayan nga mo demand ang demand," sigon ni Nuez.
Mapasalamaton sab ang kapulisan sa Provincial Government sa Bohol pinangulohan ni Governor Aris Aumentado sa suporta nga gihatag kanila.
Giangkon ni Governor Erico Aristotle Aumentado nga migara gyud ang illegal nga drugas sa probinsya pagkahuman sa termino ni Presidente Rodrigo Duterte.
"Mao bitaw nga nahibaw ta nga naay druga nga anaa sa Bohol tungod kay ang atong directives sa kapulisan is to apprehend, dakpon gyud ang mga namaligya og shabu. Ug wala pa tay gihimo sigurado ko nga wala ta nahibawo nga naay shabu ang Bohol," ni Aumentado pa. (BANAT NEWS)
- Latest
