Garcia gusto ipaagi og PPP ang underground railway

CEBU, Philippines — Buot ni Gobernador Gwendolyn Garcia nga ipaubos sa Public-Private Partnership (PPP) ang pagpatuman sa 67.5 kilometro nga underground passenger railway line.

Atol sa pagpresentar sa project summary sa Department of Transportation (DOTr) ngadto sa gobernador, si Timothy John Batan ang undersecretary sa planning and project development sa DOTr nagkanayon nga ang maong proyekto tawagon nga Metro Cebu Urban Mass Rapid Transit (UMRT).

Ang maong proyekto magdugtong sa siyudad sa Carcar sa habagatan hangtod sa dakbayan sa Danao sa amihanang bahin sa Probinsya sa Sugbo.

Tinguha sa pagpatuman sa maong proyekto mao ang pagsulbad sa problema sa trapiko sa Metro Cebu ug pagpamubo sa oras sa pagbiyahe pinaagi sa unang underground railway system.

Si Garcia nasayod nga ang mga dagkong proyekto molanat pa og pipila ka katuigan una pa matapos  gikan sa proposal, feasibility study ngadto sa pagproseso sa mga permits ug pagkuha og approval o pagtugot gikan sa nagkadaiyang ahensya sa gobiyerno, hangtod sa pagtrabaho na mismo sa proyekto.

Kini ang hinungdan nga nisugyot si Garcia nga ipaubos kini sa PPP nga sistema kon diin ang mga lokal nga kagamhanan maoy mogunit sa proyekto samtang ang DOTr maoy magpabilin nga supervisory council.

Sumala sa Sugbo News , ang opisyal nga news network sa Kapitolyo, ang Economic Enterprise Council (EEC) sa lokal nga kagamhanan sa Probinsya Sugbo mobukas sa maong proyekto ngadto sa mga pribadong kompaniya ubos sa PPP kun diin ma-subject sab kini sa mga rules ug regulasyon ubos sa balaod.

 Nagtoo si Garcia nga pinaagi sa paghiusa sa mga LGUs sa Probinsya uban sa mga opisyal niini, mapapaspasan ang pagpatuman sa maong proyekto.

Gihangop usab ni Batan ang proposal sa gobernador ug nagkanayon " “We are excited about the possibility of another first: potentially the first subway that will be entirely financed by the local government through various funding strategies and without requiring national government funding.”— IBM BANAT NEWS