Amahan sikop human gi-live sa FB ang pagmaltro sa iyang anak

CEBU, Philippines — Usa ka 38-anyos nga amahan ang gidakop sa kapolisan sa Dakbayan sa Naga niadtong Martes diha sa Barangay South Poblacion sa maong siyudad gumikan sa pagmaltrato sa iyang 3-anyos nga anak ug gi-live pa niini sa Facebook ang iyang gibuhat aron matagad sa kanhi niya kapuyo.

Ang suspetsado usa ka drayber sa taxi, taga Purok Kalabasa, Barangay Catarman, Lungsod sa Liloan.

Nakita sa FB live sa suspetsado nga gisagpa, han-an og gituok ug gisuwayan og tigbas ang iyang kaugalingong anak.

Ug usahay anha sa sulod sa taxi himuon ang pagmaltrato sa suspetsado sa iyang anak ug adunay higayon nga adto sa ilang panimalay.

Nasayran nga diha sa sulod sa taxi gihan-an og tuok sa suspetsado ang iyang anak diin giparada niya diha daplin sa karsada sa Dakbayan sa Sugbo.

Gawas niini, makita usab sa FB live sa suspetsado nga gipukaw niya ang iyahang anak nga naghilak sa kahadlok unya makita usab ang kutsilyo ug giingnan pa niini ang bata nga “patayin kita”.

Ang maong gibuhat sa suspetsado nakapaalrma sa mga tawo apil na sa operator sa taxi nga iyang gimaneho hinungdan nga gi-trace sa GPS ang location niini ug nasuta nga anaa kini sa Barangay South Poblacion, Dakbayan sa Naga.

Giangkon sa suspetsado nga iyang nahimo ang pagmaltrato sa iyahang anak aron makuha ang atensiyon sa iyang kanhi kaipon kinsa walo ka buwan na nga atoa sa laing nasud ug gituohan nga aduna na kini ka relasyon nga langyaw ug dili na niya ma-contact tungod kay gi-block na siya niini.

Human masikop sa kapulisan sa Dakbayan sa Naga ang suspetsado gi-turnover kini sa Police Station 3 sa Cebu City Police Office (CCPO) samtang ang iyang anak anaa sa kustodiya karon sa iyahang iyaan diha sa Sitio Mabolo I, Barangay Budlaan, Dakbayan sa Sugbo.  Ang suspetsado mag-atubang og kasong kalapasan sa Akta Republik Act 7610 kun “Children Protection Act”. (BANAT NEWS)