Amahan ni Hannah Jay walay kasuko sa gobiyerno apan nahiubos sa NUPL

CEBU, Philippines — Gi-cremate na kagahapon ang patay’ng lawas sa bar passer nga si Hannah Jay Cesista kinsa apil sa lima nga nakalas sa nahitabong engkwentro tali sa giingong grupo sa mga rebelde ug kapolisan ug militar sa Purok Matin-ao 2, Barangay Campagao, Lungsod sa Bilar, Probinsiya sa Bohol niadtong Biyernes sa buntag.

Ang amahan ni Hannah Jay nga si Eutropio Cesista ang niproseso sa cremation sa patay’ng lawas sa iyahang anak diha sa Cosmopolitan Funeral Homes sa dalan Junquera, Barangay Kamagayan, Siyudad sa Sugbo kagahapon sa buntag.

Si Eutropio nipadayag sa ilang kagul-anan tungod kay wala sila magdahom nga  mahitabo kini sa iyang kinamanghuran nga anak.

Giklaro usab ni Eutropio ngadto sa mga tigbalita wala siya’y kasuko sa gobiyerno kalabot sa hitabo apan nipadayag kini nga aduna siya’y gamay’ng kahiubos sa grupo nga giapilan sa iyahang anak.

Gibutyag ni Eutropio nga gipugngan niya ang iyahang anak nga moapil sa National Union of Peoples’ Lawyer (NUPL) apan nakombinsir siya nga tugtan kini nga moapil tungod kay gipasabot siya nga mga abogado ang iyahang mga kuyog gani iyaha pa kining giingnan nga mag-amping.

Ang maong amahan nisalig sa NUPL tungod kay giingong asosasyon kini sa mga abogado nga mao ang gipasabot sa iyahang anak kaniya.

“Ang masasabi ko lang sana ang anak ko na ang huli, huling biktima, yun lang”, mensahe ni Eutropio ngadto sa NUPL.

Kagahapon sa gabii nibiyahe paingon balik ngadto sa Northern Samar ang pamilya ni Hannah bitbit ang iyahang abo.

Sa oras sa pagsuwat niining balita gihuwat pa ang tubag gikan sa NUPL mahitungod sa pamahayag sa amahan ni Hannah.

Sayo pa ang maong grupo nipagawas og pamahayag nga volunteer sa NUPL Cebu si Hannah ilabi na sa panahon nga nagtungha pa kini sa abogasiya.

Sa laing bahin, walay hunong ang kagamhana sa Probinsya sa Bohol sa ilang programa aron hingpit nga malimpiyo ang probinsya sa mga rebeldeng grupo.

Si Bohol Governor Aris Aumentado nimando sa kapolisan ug kasundalohan nga mohimo og forum sa mga eskwelahan tungod kay giingong kasagaran sa mabiktima sa mga walhong pundok mga tinun-an. (BANAT NEWS)