Namusil sa amahan ug anak sa Mabolo nailhan na

CEBU, Philippines — Nailhan na sa Mabolo Police Station sa Cebu City Police Office (CCPO) ang suspek sa pagpamusil nga nahitabo diha sa Pope John Paul II, Barangay Mabolo, Siyudad sa Sugbo niadtong Lunes sa gabii.

Naangol sa maong pagpamusil ang 25-anyos nga lalaki ug ang 2-anyos niini nga anak.

Ang biktima mga residente kini diha sa Sitio Holy Name sa nahisgutang barangay.

Base sa report sa Mabolo Police Station nga ang biktima sakay sa motorsiklo niini uban ang iyahang 2-anyos nga anak nga nagbiyahe diha sa dalan Pope John Paul II.

Pag-abot sa mga biktima diha sa lugar usa ka nag-inusarang lalaki nga nagpaabot ug sa walay igong rason nipusil ngadto sa biktima makadaghang higayon.

Ang biktima nakaangkon kini og mga samad pinusilan sa nagkadaiyang parte sa lawas ug naangol usab ang anak niini diin ang duha daling gidala ngadto sa tambalanan.

Human sa pagpamusil daling nisibat ang suspetsado pahilayo sa lugar.

"Base sa report namo nga nakuha naa siya'y gika-contact sa cellphone unya mag-abot kuno sila didto sa lugar unya mao nato nahitabo nato ang pagpamusil", matud ni Police Major Romeo Caacoy, Jr., hepe sa Mabolo Police Station. Giingong ang namusil ug ang asawa sa biktima nalambigit sa ilegal nga drugas ug usa kini sa ilang gilantaw sa kapolisan nga usa sa mga motibo.

Gikataho nga drug personality ang maong suspetsado sa nahisgutang krimen. BDB BANAT NEWS