Padung manari nabangga sa trak, duha patay

CEBU, Philippines — Duha ang namatay sa dihang ang motorsiklo nga ilang giluwanan nabangga sa tractor diha sa General  Aviation Road sa Sitio Hangar, Barangay Bankal,  Siyudad sa Lapu-Lapu niadtong Domingo sa hapon.

Si Police  Lieutenant Colonel Christian Torres, pangulo  sa City Investigation Detection and Management Unit (CIDMU) ug  tigpamaba sa Lapu-Lapu City  Police Office  (LCPO) miila sa  duha nga namatay nga sila si Fredie, 37, ug Eliseo, 42, pulos molupyo  sa Dumpsite sa Sitio Soong sa Barangay Mactan sa maong dakbayan. Matud pa ni Torres mihangyo ang banay sa mga namatay nga di lang ibutyag ang apelyedo sa duha.

Giingong si Freddie maoy nagmaneho sa motor ug angkas si Eliseo, naggunit kini sa duha ka mga manok nga igtatari kay matud pa padung sila manari sa buwangan sa Suba-Basbas.

Gikatahong kusog nga nagpadagan sa motor ang duha ug pagabot sa

eskina General Aviation  Road sa Sitio Hangar sa Barangay sa  Bankal kalit lamang kining nabangga sa maong trak nga gimaneho ni Arnel Rodinas Superable, 32, nagpuyo usab sa maong dapit.

Matud pa ni Torres nga tungod sa kakusog sa pagbangga, nalamba ang duha taliwala sa karsada nga nakaingon sa grabeng kadaaut sa ilang kalawasan.

Dali unta silang gidala sa tambalanan apan gideklarar kini sa mga doktor  nga dead  on arrival.

Dugang pa ni  Torres  apil sab sa namatay ang duha ka mga  manok nga igtatari  nga gidala sa duha.

Si Torres miingon nga kasamtangan karon nilang gikustodiya ang driver sa prime mover samtang gipaabot ang banay sa duha kun mopasaka sila og kaso batok niini.

Sa pikas bahin, tulo ka sakyanan nagkarambola diha sa Cebu South Coastal Road (CSCR) sa habig sa Barangay Cansojong, Dakbayan sa Talisay kagahapon sa buntag.

Si Jonathan Tumulak, pangu sa City of Talisay-Traffic Operation Development Authority (CT-TODA) nibutyag nga pulos paingon sa habagatan ang mga sakyanan.

Apan sa pag-abot sa lugar miharos ang truck sa SUV dayon ang naulahi midumbol sab sa pick up nga naa sa atubangan niini.

Sigon pa ni Tumulak nga wala mogana ang brakes sa truck hinungdan nga iya kining nabanggaan ang nag una nga sakyanan. Nakatampo sab sa disgrasya mao ang basa nga karsada gumikan sa uwan.

Matud pa ni Tumulak nga pulos ra hinuon luwas ang mga drayber bisan paman sa panghitabo.

Gihangyo sa opisyal ang mga motorista nga susihon gyud una ang mga sakyanan sa di pa momaneho aron siguro nga kondisyon kini sa biyahe. — Rowena Capistrano, Gabriel Bonjoc (BANAT NEWS)