Leadman padung trabaho gipaulanan og bala patay
CEBU, Philippines — Gipusil patay ang usa ka leadman nga padung na unta sa iyang trabaho diha sa Saksak Abucayan, Lungsod sa Balamban, kagahapon Biyernes sa buntag Pebrero 23, 2024.
Ang biktima nailhan nga si Alberto Inan Durado, 47, taga Centro Abucayan sa nahisgutang lungsod.
Si Durado matud pa usa ka leadman sa subcontractor sa usa ka kompanya sa barko nga naa nahimutang sa Barangay Buanoy sa maong lungsod. Si Police Lt. Col. Joey Bicoy hepe sa Balamban Police Station mibutyag nga samtang paingon na motrabaho ang biktima gisundan kini sa mga mamumuno nga nagsakay sab og motorsiklo ug kalit kini nga gipusil tulo ka higayon.
Human sa pagpusil, daling misibat pahilayo ang duha. Ang biktima nahagba sa kalsada nakahiagum og samad pinusilan sa nagkadaiyang parte sa lawas nga maoy hinungdan sa iyang hinanaling kamatayon.
Nakuha gikan sa crime scene ang tulo ka kabhang sa bala sa kalibre 45 nga pistola.
Ang kapolisan sa Balamban Police Station padayon pang nagsusi kun unsay motibo sa maong krimen ug gisubay na sab ang mga CCTV sa maong lugar alang sa posibleng pag-ila sa mga responsabli.— IBM BANAT NEWS
- Latest