CCPO preparado na sa EDSA ug prayer rally

CEBU, Philippines — Gibutang sa full alert sugod kagahapon Pebrero 23, 2024, ang Cebu City Police Office(CCPO) tungod sa mga dagkong kalihukan nga mahitabo sa siyudad ilabi na karong adlaw’ng Domingo, Pebrero 25, 2024.

Karong petsa 25 sa buwan sa Pebrero, Domingo mao ang prayer rally nga gipangulohan sa pro-Duterte groups nga ipahigayon sa Kasadya Ground sa South Road Properties ug mao sab ang People Power Anniversary.

Sigon ni Police Lieutenant Colonel Janette Rafter, Deputy City Director for Operations sa Cebu City Police Office  aduna na silay security plans alang sa maong mga kalihukan.

Wala gibutyag sa kapulisan kun pila ka police ang ipakatap sa kapulisan apan nasayran nga dunay ipadala nga augmentation ang Police Regional Office (PRO)-7 aron motabang sa pagbantay.

Nakadesidir ang CCPO nga mag full alert status tungod kay daghang mga VIPs ang moanhi sa Siyudad sa Sugbo.

Subay niini, si Police Lieutenant Colonel Gerard Ace Pelare, tigpamaba ni Police Regional Office (PRO)-7 Director Brigadier General Anthony Aberin miingon nahan-ay na ang security preparations, dunay gihimong walkthrough kini subay na sab sa mando sa ilang labaw. --  IBM BANAT NEWS