MGA Scholar alang sa agrikultura nikunhod

CEBU, Philippines — Naobserbahan karon ang pagkunhod sa mga scholar sa Dakbayan sa Sugbo nga nagsunod sa mga programa sa agrikultura samtang ang ubang mga hagit sa pagpanguma sa siyudad gidiskusyonan atol sa public hearing sa gisugyot nga ordinansahon nga naghatag og educational scholarship assistance sa mga kwalipikadong residente sa Dakbayan sa Sugbo.

Ang maong ordinansahon gipangamhanan kini ni Konsehal Jun Alcover, chairman sa committee of agriculture sa Dakbayan sa Sugbo nga adunay tumong sa panginahanglan ug paghatag og gibug-aton sa papel sa mga mag-uuma sa pagpadayon sa food production.

Ang mga mag-uuma nipadayag kang Alcover nga kasagaran sa ilang mga anak wala na nagtinguha sa mga kursong subay sa agrikultura.

Ug gumikan kay tiguwang na ang mga mag-uuma posibleng wala nay mosunod kanila sa pagpanguma tungod kay dili interesado ang ilang mga anak.

Atol sa public hearing kagahapon si Cebu City Agriculturist Joelito Baclayon nipadayag sa baroganan sa ilang departamento.

 It s true nga ato po ng mga mag-uuma nagkatigulang na but they were in fact with the of average of 57-years old and as can be observed nobody, perhaps, following them , matud ni Baclayon.

Matud ni Baclayon nga ang ordinansa usa ka paagi aron madani ang daghang mga estudyante nga mopadayon sa edukasyon sa agrikultura.

Gisugyot ni Baclayon nga gawas sa kurso sa agrikultura, ang mga kurso sa veterinary ug food technology kinahanglan usab nga ilakip sa ordinansa.

Atol sa diskusyon, gitumbok ni Alcover ang komprehensibo nga probisyon nga dili lang naglangkub sa tuition fees, apan lakip ang insentibo, accommodation, ug transportation assistance sa mga estudyante.

Ang executive director sa Cebu City Scholarship program, Judy Concepcion Yap  nipresentar sa gidaghanon sa mga scholar sa mga programa sa agrikultura ilabi na sa CTU-Bonbon.

Matud ni Yap nga sa tanan nilang accredited nga mga tunghaan ang CTU-Bonbon ra ang nagtanyag og mga programa sa agrikultura.

Si Konsehal James Anthony Cuenco nipadayag sa kabalaka nga lima lang ka tinun-an ang na-enrol alang sa 4th year atol sa unang semester karong tuiga. (BANAT NEWS)