Rama gustong pabotaron ang taga Cebu City sa Probinsiya

CEBU, Philippines — Samtang saulogon sa Dakbayan sa Sugbo ang ika-87 nga charter anniversary giduso ni Cebu City Mayor Michael Rama ang pagrepaso sa Charter sa siyudad.

Gusto sa Mayor nga ang Cebu City adunay stake sa Cebu Provincial Government pinaagi sa pagtugot sa mga residente niini nga makabotar sa gobernador sa lalawigan.

Sumala pa ni Rama, nakigbisog lang siya sa iyang gituohan nga gipakigbisogan sa iyang apohan nga si Don Vicente Rama.

Isip usa ka higly urbanized city ang Cebu City, kinahanglan nga magpabiling independente sa mga kalihukan sa local nga kagamhanan.

Gihimug-atan sa mayor ang kamahinungdanon sa pagtahod, pagtinabangay tali sa Cebu City ug Cebu Province.

Ang mayor nitahas sa iyang anak nga si Atty. Mikel Rama aron tan-awon ang maong butang ug makig-alayon kang Cebu South District Rep. Eduardo Rama Jr may kalabutan sa pagduso sa posibleng pag-amendar sa charter law sa dakbayan ngadto sa kongreso.

Si Atty. Mikel sa iyang bahin nibutyag nga ang tibuok buwan sa pagsaulog sa charter anniversary sa siyudad usa kini ka oportunidad sa pagtutuk sa kasaysayan sa siyudad.

Wala hinoon mohatag og timetable si Mikel apan kini nipadayag nga ang labing importante nga nasugdan na nila ang pagtan-aw sa maong plano ug tan-awon lang nila kun asa kini padulong. MEL BANAT NEWS