Cebu City mibubo og P26 milyon para sa barangay roads

CEBU, Philippines — Mga proyekto nga gipatuman sa lima ka mga barangay sa Dakbayan sa Sugbo nga nibalor og P26 milyones ug kini nahuman na ug gi turnover kagahapon ni Mayor Michael Rama.

Ang maong mga proyekto naglakip sa pagsemento sa kadalanan nga nahimutang sa Barangay Pasil, Suba, Basak San Nicolas, Basak Pardo ug Tisa.

Tinguha sa mayor nga masemento ang kadalanan sa Dakbayan dili lang sa maong lima ka mga barangay apan tanang 80 ka barangay sa siyudad.

Gawas sa dalan, butangan sab kini og mga drainage network sa kilid-kilid aron dunay maagian sa tubig kun mag-uwan.

Sa Barangay Tisa, gisemento ang dalan nga nagkantidad og P38 milyones; Pasil P5 milyones sa duha ka gisemento nga dalan samtang P14.1 milyones ang pagpasemento usab sa karsada sa barangay Suba.

Gi-turnover usab ang Material Recovery Facility sa Barangay Basak Pardo nga gipundohan og usa ka milyon lakip usab ang Health Center sa Barangay Basak San Nicolas nga gigastohan og P1.4 milyon.

Gikan sa Local Development Fund sa kagamhanan ang pundo sa maong proyekto nga gipatuman agi sa Department of Engineering and Public Works.

Si Rama niawhag sa mga opisyal ug sa mga residente sa mga barangay nga nakadawat sa proyekto nga ampingan kini kay sila man ang mabulahan niini. IBM BANAT NEWS