Magparehistro nidagsa sa mga buhatan sa Comelec

CEBU, Philippines — Niabot ngadto sa 5,082 ang natala sa Comelec Cebu Provincial Office nga gidaghananon sa nagparehistro atol sa unang adlaw sa pagpangrehistro niadtong Lunes.

Kini ang gipahibalo sa election officer sa Dakbayan sa Carcar ug kasamtangan nga tigpamaba sa COMELEC Central Visayas Omar Sharif Mamalinta.

Matud ni Mamalinta nga atol sa unang adlaw sa registration kinsa gideklarar usab nga National Voters Day nakatala sila sa maong gidaghanon  nga nagparehisgro diin 2,525 niini mga lalaki samtang 2,557 mga babaye.

Ang maong gidaghanon naggikan kini sa 54 ka siyudad ug kalungsuran sa Probinsiya sa Sugbo.

Gibutyag ni Mamalinta nga ang Lungsod sa Pilar, Isla sa Camotes maoy adunay pinakaubos nga registration turn-out nga pito lang samtang ang Cebu City 2nd district maoy adunay pinakadaghang turn out nga niabot ngadto sa 543.

Matud usab ni Mamalinta nga padayon gihapon ang ilang pagpanawat sa rehistro hangtud sa Septiyembre 30, 2024 samtang aduna usab sila’y mga kalihokan nga gihimo samtang nagpdayon sa pagpangrehistro sa Dakbayan sa Carcar sama sa paghatag og facemask, chocolates ug uban pa sa umaabot nga adlaw. Nunot niini, gidagsa usab sa mga magparehistro ang buhatan sa Comelec  sa Siyudad  sa Mandaue kagahapon nga maoy ikaduhang adlaw nga pagpangrehistro  sa mga bontante isip kabahin sa gihimong pagpangandam sa 2025 local ug national election.

Si Election Officer Anna Fleur Gujilde sa Comelec sa Siyudad  sa Mandaue nagkanayon nga bisan kinsa nga taga gawas sa Sugbo nga nagtinguha sa pagbotar sa 2025 midterm election apan maglisod sa pagpauli sa ilang tagsa-tagsa ka mga lalawigan mahimo kining magparehistro sa Siyudad  sa Mandaue. Gitinguha karon sa ilang buhatan ang paglusad og mga pilot registration nga ilang gitawag og Register Anywhere Program (Rap) karong Pebrero 27, 2024 diha sa mga tunghaan nga naglakip  sa University of San Carlos sa Talamban Campus ug Pebrero 28  sa Cebu Doctor’s University.

Matud ni Gujilde nga atol sa paglusad sa maong programa motambong niini kadagkoan sa Comelec gikan sa ubang mga lugar.

Ug atol sa maong pilot testing ilang tugotan ang mga tinun-an ug ang mga school personnel sa pagsalmot niini.

Dugang ni Gujilde nga posible nga molusad pa sila sa maong programa ngadto sa uban pa nga mga buhatan sa kagamahanan ug ipahibalo lang unya nila ang dapit niini human sa pilot testing nga ipahigayon. BDB BANAT NEWS