Lalaki nga manghulga nasikop sa CIDG

CEBU, Philippines — Nadakpan sa Criminal Investigation and Detection Group (CIDG) Cebu City Field Unit pinasikad sa search warrant ang 39-anyos nga lalaki diha sa Sitio Mahayahay, Barangay Calamba, Siyudad sa Sugbo kagahapon sa buntag.  Ang suspetsado mao si Felix Charles Aliño Ramos, 39, nagpuyo sa naasoy nga lugar.

Ang kapolisan nakadawat og taho nga nagtenir og kalibre .45 nga pistola nga dili lisensyado ang suspetsado ug giingong magpasalba kini kong makainom diin nakahatag kini og kahadlok sa mga residente sa lugar.

Gawas niini, giingong manghulga ang suspetsado sa tigkolekta sa binuwan nga bayad sa motorsiklo.

Nihimo og validation, casing ug surveillance ang kapolisan ug nasuta nga tinuod ang nadawat nila nga taho hinungdan nga ni-apply sila og search warrant ngadto sa korte batok sa suspetsado niadtong Pebrero 8, 2024.

Gawas sa armas nasakmitan usab ang suspetsado og gamay'ng pakete sa shabu ug drug paraphernalia.

Sa laing bahin, nasakmit sa Lapu-Lapu City Police Office  (LCPO)  ang 89.71 gramo  nga shabu gikan sa 24  ka pusher nga naglakip sa duha ka mga high value individual nga ilang nadakpan sulod sa usa ka semana nilang operasyon  nga nagsugod niadtong Pebrero  4, hangtud sa 10, 2024. BDB BANAT NEWS