Balaudnon  maghatag og P100  umento sa suhulan gihangop

CEBU, Philippines — Gihangop sa AMA Sugbo KMU ang balaodnon nga maghatag og P100 wage increase kun umento sa suhulan sa mga kawani sa pribadong sector pinaagi sa Senate Bill 2534.

Matud pa ni Jaime Paglinawan, AMA Sugbo KMU, Chairman nga bisan og layo ra kaayo kini sa giduso sa mga trabahante sa Central Visayas nga P1,259 matag adlaw alang sa desente nga pagbuhi sa ilang pamilya apan ila gihapon gihangop ang maong balaodnon.

Giklaro usab ni Paglinawan nga walay kamatuoran ang pangangkon nila ni Sergio Oritz Luis Jr., presidente sa Employers Confederation of the Phillipines (ECOP) ug ni DOLE Secretary Bienvenido Laguesma nga ang pagpatuman sa maong wage increase mosangko usab sa pag-umento sa presyo sa mga palaliton ingon man sa serbisyo.

Ang tinuod matud pa ni Paglinawan nga dili lang buot ang mga kapitalista nga makuhaan ang ilang ginansya sa higayon nga dunay umento sa suhulan.

Gipahinumduman niini nga kinahanglan ipatuman ang 1987 Philippine Constitution Article XIII for Social Justice and Human Rights diin ang section 3 niini naglatid nga kinahanglan protektahan sa estado ang mga mamumuo lokal man o overseas ug kinahanglan nga aduna kini security of tenure, humane working conditions, ug living wages.  Subay niini nanawagan ang AMA Sugbo KMU nga hatagan og dakong atensyon ang maong umento sa suholan og paspasan ang pagpasar sa Senate Bill 2534.

Lakip sa ilang sugyot mao ang paggama usab sa kongreso og susama nga balaodnon og dili unahon ang charter change. — MEL BANAT NEWS