Namuyo sa mga luna sa Kapitolyo gitagalan og 90 ka adlaw

CEBU, Philippines — Gitagalan mo Gob. Gwen Garcia og 90 ka adlaw ang mga miyembro sa tanang homeowner associations nga nagpuyo sa mga luna sa probinsya sa Sugbu nga naa sa Dakbayan sa Sugbu aron lihukon ang pagproseso sa ilang housing loan applications sa Pag-IBIG Fund aron di sila magkaproblema.

Si Garcia miluwat sa maong pamahayag atol sa pakigtigum niya kang Cebu City Vice Mayor Raymond Garcia, Pag-IBIG Fund Visayas head Paulino Talacay, ug mga opisyales ug mga miyembro sa mga homeowner associations diha sa Capitol Social Hall niadtong nakalabay nga Biyernes, Pebrero 2.

Sa report sa Sugbu News, ang opisyal nga news network sa kapitolyo,  dunay 44 ka homeowner groups nga nagpuyo sa mga luna sa Kapitolyo.

Kini naa nahimutang sa barangays Busay, Luz, Lahug, Mabolo, Apas, Lorega San Miguel, Kasambagan, Capitol Site, Tejero, Kamputhaw, ug Kalunasan.

Ang mga okupante gikinahanglang makaduos na og aplikasyon sa dili pa ang Mayo 2 ning tuiga. Ang mga okupante gihatagan og pabor sa termino kun unsaon nila pagbayad ang PAG-IBIG, apan ang maong ahensiya maoy mobayad sa maong mga luna ngadto sa Kapitolyo basi sa fair market value.

“Palihug lang, pagka-May 2, meeting ta diri balik. Tagsa-tagsaon nako kada asosasyon kung kinsay nakumpleto. Hopefully, walay uban nga dili kumpleto, apan katong dili kumpleto, kuyogan lang ta mo sa CPDRC,” matud pa sa gobernador nga ang gipasabot mao ang Cebu Provincial Detention and Rehabilitation Center. — /IBM (BANAT NEWS)