Construction sa CCMC ipadayon karong buwana

CEBU, Philippines — Gikatakda karong buwana ang pagpadayon sa construction sa Cebu City Medical Center (CCMC) diin walay gasto niini ang kagamhanan sa Dakbayan sa Sugbo ug gibana-bana nga moabot ngadto sa 500-bed capacity ang maong tambalan kong mahuman na kini.

Kini ang gibutyag ni Doctor Peter Mancao, CCMC office-in-charge sa pakighinabi niini sa mga tigbalita.

Matud ni Mancao nga ang construction alang sa vertical ug horizontal development sa CCMC ang magsugod karong buwana.

Ug ang horizontal development alang sa pag-furnish sa mga floor nga nahuman na apil niini ang ikaupat nga floor nga alang sa operation room ug delivery room        complex.

Lakip usab ang ikalima nga floor alang sa Pediatric ICU ug ICU complex samtang ang ikaunom nga floor alang sa administrative office ug ang ikapito nga floor alang sa Operation Smile and Eye Institute.

Alang sa vertical development apil na niini ang pagtukod sa mga accommodation rooms nga mao ang mga hospital ward gikan sa 8th hangtud sa 10th floor.

Si Mancao nagkanayon nga sulod sa usa ka tuig ang target nga mahuman ang construction.

Gipadayag ni Mancao nga ang pundo sa maong proyekto gikan kini sa pribado pinaagi ni Cebu City Mayor Michael Rama apan wala niya ibutyag ang tukmang kantidad.

Base sa taho sa Cebu City Information Office niadtong Septiyembre 12, 2023 gibutyag ni Mancao nga nagpaabot sila sa advise sa City Legal Office kabahin sa memorandum of agreement (MOA) nga pirmahan sa siyudad ngadto sa Cebu Medical Society (CMS).

Ang MOA magtugot sa CMS nga usa ka non-profit nga organisasyon sa pagdumala sa mga donasyon nga gisaad sa mga pribadong entity nga makompleto ang buildings sa ospital hangtud sa ikanapulo nga andana.

Sa samang taho,  gibutyag ni Mancao nga nakadawat si Rama o pledges gikan sa nagkalain-laing pribadong entity atol sa sunod-sunod nga marketing investment missions niadtong  tuig 2022 gikan sa P100 milyones ngadto sa naming rights sa matag andana. Lakip sa nahisgutan ang Aboitiz Equity Ventures, Ayala Land, Inc., D.M. Consunji, Inc. (DMCI) Holdings, Filinvest Land, Inc., ug Megawide Construction Corp.

Gawas niini, adunay mga pribadong entidad sama sa Metro Pacific Investments Corp., Robinsons Land Corp., SBS Philippines Corp., SM Prime Holdings, Inc., ingon man mga grupo sa China ug Canada kinsa nisaad usab nga motabang sa siyuydad. (BANAT NEWS)