Gatusan nisalmot sa paghandom sa Universal Declaration of Human Rights

CEBU, Philippines — Gatusan ang nisalmot sa paghandom kagahapon sa Universal Declaration of Human Rights nga gipangulohan sa Philippine Alliance of Human Rights Advocates-Cebu ubos sa pakigtambayayong sa Sanlakas Cebu ug sa mga kaalyado nga organisasyon niini.

Ang selebrasyon nagsugod sa alas 9:00 sa buntag pinaagi sa usa ka mubo nga programa diin ang mga mamumulong nipadayag sa nagkalain-laing mga kalapasan kalabot sa sibil, politikal, ug socio economic nga mga katungod dili lang sa Pilipinas apan sa tibuok kalibutan.

Ang krisis sa klima ug kalikupan mao usab ang mga gihisgotan atol sa programa.

Sa iyang pakigpulong, si Teody Navea sa Sanlakas Cebu nipadayag sa iyang kaguol sa kagrabe sa sitwasyon sa Gaza diin 22,000 na ang nangamatay sukad niadtong Disyembre 8, 2023.

Gipahigayon ang 30 segundo nga paghilom alang sa pag-ampo aron sa pagpakita og simpatiya sa Palestinians.

Usa ka symbolical die-in-protest nga giapilan sa mga batan-ong henerasyon ang gihimo usab nga nanawagan sa gobiyerno sa Israel nga hunongon ang gubat ug ipahigayon ang immediate ceasefire Gaza. (Gikan sa The Freeman/BDB) (BANAT NEWS)