Manhunt sa nagpatay sa polis gipalapdan

CEBU, Philippines — Gipasalig ni Police Brigadier General Anthony Aberin, Regional Director sa Police Regional Office-7 nga dili sila mohunong sa pagpangita sa mga suspek nga mipusil-patay kang Police Corporal Ryan Languido Baculi atol sa buybust operation.

Tipik kini sa pamahayag nga gipagawas ni Brigadier General Aberin dungan sa pag-ingon nga manubag ang mga suspetsado nga sila si Atong Rafols alyas Atong ug Ramil Salazar alyas Namol ug mahatagan og hustisya ang nahitabo sa maong polis.

Gimando ni  Aberin sa tanang kwerpo sa kapulisan sa Central Visayas nga mohimo og wala’y puas nga paggukod ug wala’y undang nga pagpangita sa mga suspects sa pagpusil-patay kang Baculi.

“Nahibalo mi nga dili madugay makab-ot ra nato atong hustisya ug ang among assurance sa katawhan ang inyong Police Regional Office-7 dili moundang hantod atong madala sa hustisya kining duha ka criminal nga naghimo niini,” sigon ni Police Lt. Col. Gerard Ace Pelare, tigpamaba sa PRO-7.

Gihimo na sab ang imbestigasyon kun unsa ka tinuod ang report nga gitabangan matud pa sa barangay tanod ang mga suspetsado nga makaikyas.

Si Baculi kinsa sakop sa Regional Drug Enforcement Unit-7 nagsilbing poseur buyer sa gipahigayon unta nga buy-bust operation sa Sitio Panagtambayayong, Barangay Kinasang-an ning Dakbayan sa Sugbo, alas-12 sa kaadlawon adlaw nga Miyerkules.

Ihatag sab sa PRO-7 ang benepisyo nga angay sa nabiyaang pamilya ni Baculi. Bisan pa sa mga panghitabo dili mohunong ang PRO-7 sa ilang pakigbatok sa illegal nga drugas.

Niapil na sab ang Cebu City Police Office (CCPO) sa pagpangita sa mga suspek subay na sab sa kamanduan ni CCPO Director Police Colonel Ireneo Dalogdog.

Nasayran nga si Atong Rafols nasulod na sa Operations Second Chance gumikan sa kasong murder sa dihang menor de edad pa kini apan sa dihang nag 18 anyos na siya gibalhin siya sa Cebu City Jail Male Dormitory tipon sa mga hamtong nga mga priso.

Gawas niini, usa sab siya sa suspetsado sa shooting incident sa Inayawan ug aduna kini pending nga warrant of arrest.

Gumikan kay armado ang mga suspetsado nagpahimangno ang CCPO sa ilang mga ginsakpan nga dili mokompiyansa.—  IBM (BANATNEWS)