Hepe sa tanod gidakop tungod sa kasong pagpatay
CEBU, Philippines — Nadakpan sa manhunt operation sa Criminal Investigation and Detection Group (CIDG) Cebu Province Field Unit ang 49- anyos nga lalake nga naa sa ika-upat sa listahan sa most wanted persons sa rehiyon ug ug no. 1 sa provincial level tungod sa kasong murder.
Ang operasyon nahitabo sa Roosevelt, Barangay Busay, siyudad sa Sugbo dihang usa ka lalaki ang gidakop. Nakuha gikan kaniya ang ID nga nagdala sa pangalan nga Ronilo Rebonza Hermoso, hepe sa mga barangay tanod sa maong barangay.
Ang warrant of arrest gikan ni Acting Presiding Judge Dax Gonzaga Xenos, sa Regional Trial Court Branch 23, Cebu City penetsahag Abril 14, 2023 ug walay piyansa nga girekomendar.
Gipasakaan og kasong murder si Ronilo nga hepe sa mga tanod sa Barangay Busay ug igsuon niini nga si Jovelito Hermoso, human matud pa nagkunsabo sa pagpusil patay sa usa ka Ken Viga sa Barangay Babag, Siyudad sa Sugbo niadtong Agosto tuig 2022.
Nahitabo ang pagpamusil tungod matud pa sa away nga naglambigit sa mga batan-on atol sa kapistahan sa ilang barangay nga niresulta sa maong pagpamusil. — /IBM (BANAT NEWS)
- Latest