Tattoo artist gipusil patay; 16 ka shooting incident natala sa CCPO

CEBU, Philippines — Patay ang usa ka tattoo artist human pusila sa wala mailhing kriminal kagahapon sa kadlawon diha sa Sitio Auto Bus, Barangay Calamba, Dakbayan sa Sugbo.

Ang biktima mao si Adrian Lloyd Flores, 32-anyos, ulitawo, residente sa C. Padilla Street, Barangay Duljo Fatima niining siyudad.

Ang kapolisan sa Sawang Calero Police Station daling niresponde human nakadawat og taho sa maong insidente.

Base sa imbestigasyon sa kapolisan nga ang biktima giingong adunay ikatagbo diha sa maong lugar mga alas 12:30 sa kadlawon nga posibleng customer nga magpa-tattoo apan samtang naglakaw kini kalit kining gipusil sa wala mailhing kriminal.

Ang biktima nakaangkon og samad pinusilan sa iyang ulo ug lawas nga gituohang hinungdan sa iyang kamatayon.

Ang kapolisan padayon pa karon sa pagpahigayon og imbestigasyon pag-ila sa kriminal ug sa motibo sa maong pagpamusil.

Sa laing bahin, niabot ngadto sa 16 ka insidente sa pagpamusil sa Siyudad sa Sugbo ang natala ang Cebu City Police Office(CCPO) diin 11 niini nanhitabo niadtong buwan sa Septiyembre ug lima sa buwan sa Oktubre pareho karong tuiga.

Matud ni Police Lieutenant Colonel Albert Reeves Quilitorio, public information officer sa CCPO nga base sa ilang imbestigasyon kasagaran sa mga rason sa maong pagpamusil mao ang personal nga bangi o kalambigitan sa ilegal nga drugas.

Si Quilitorio nagkanayon nga sa 11 ka insidente nga nahitabo sa buwan sa Septiyembre pito niini ang nasulbad na.  Buot pasabot sa nasulbad mao nga nailhan na ang mga suspetsado, nadakpan ug napasakaan na og kaso ug ang uban nagpadayon ang imbesigasyon aron mailhan ang naghimo sa krimen.

Ang CCPO nagkanayon nga bisan pa sa nahitabong shooting incidents walay angay ikaalarma gumikan kay kontralado nila ang sitwasyon ug mas gipalig-on nila ang police visibility diin makita ang mga polis nga gipakatap diha sa kadalanan nga nagsakay patrol ug ang uban naglakaw.  Decemay P. Padilla, BDB (BANATNEWS)