Pork ban gikan sa Negros Oriental gilibkas
CEBU, Philippines — Gilibkas na sa lokal nga kagamhanan sa Probinsya sa Sugbo ang ban o pagdili niini pagpasulod sa mga baboy ug produkto sa baboy gikan sa Negros Oriental.
Si Gobernador Gwendolyn Garcia miluwat og executive order number 7 paglibkas sa temporaryong pagban sa mga live hogs, sows, piglets, boar semen ug pork-related products gikan sa Negros Oriental padulong sa Probinsya sa Sugbo.
Si Garcia unang midili sa pagpasulod sa mga baboy sa Probinsya gikan sa silingang lalawigan niini tungod sa hulga sa African Swine Fever (ASF).
“There is a need to address the rising cost of lechon which affect Cebuano consumers,” pagbasa sa executive order ni Garcia penetsahan Abril 25, 2024.
Sa iyang executive order, si Garcia nagkanayon nga bisan gilibkas na ang ban aduna gihapon rekisitos nga angay sundon sa pagpasulod sa mga baboy.
Ang pagkarga ug byahe sa mga binuhing baboy, breeders, genetic materials ug pork products gikan sa Negros Oriental padulong sa Cebu kinahanglan adunay mga dokumento nga mapakita sama sa veterinary health certificate nga gi-isyu sa lisensyadong veterinarian; livestock handler license; certification of disease surveillance on classical swine fever ug ubang swine disease nga giluwat sa city o municipal veterinarian; certificate of ASF-free status; negative ASF test result; local shipping permit; livestock transport pass ug uban pa.
Alang sa mga frozen pork products, kinahanglan adunay meat inspection certificate (MIC), certificate alang sa mga locally sourced meat; certificate of meat inspection (COMI) sa mga imported meat; certificate of acceptance gikan sa Provincial Veterinary Office ug transport pass.
Nimando ang gobernador sa Philippine National Police, Coast guard, Cebu Port Authority (CPA), Mactan Cebu International Airport Authority ug sa tanang Mayor sa Probinsya nga ipatuman ang iyang bag-ong giluwat nga EO. IBM BANAT NEWS
- Latest
