Gisud sa lawak, duha gipatay

CEBU, Philippines — Patay sa pagpamusil ang mag live-in partners human gisulod ang ilang panimalay sa wala mailhing mga mamumuno diha sa Sitio Naba, Barangay Mambaling, siyudad sa Sugbo kagahapon sa kaadlawon.

Ang mga biktima mao sila si Rolando "Lando" Bangkal ug Relina "Itang" Tinapay,  mga residente sa naasoy nga dapit.

Matud ni Police Major Jonathan Beethoven Taneo, hepe sa Mambaling Police Station gisusi nila ang report nga nalambigit sa ilegal nga drugas ang duha.

Kay matud pa sa wala pa ang krimen gikatahong dunay nakasumpaki nga drug personality atol sa usa sa mga transaksyon niini sa ilegal nga drugas apan wala maklaro kun kanus-a kini nahitabo.

Duha ka mga lalaki ang gikatahong misulod sa balay sa duha nga niadtong tungora nahinanok sila sa pagkatulog ug walay daghang pasangil gipamusil sila dihadiha sa makadaghang higayon.

"Karon padayon among pag imbestigar para ma find out kung confirm ni nga iestorya kay gisulod ilang balay nga ang mga tawo nakit-an nila wala tangtanga ang helmet, nisulod, naka jacket, gikuha ilang mga cellphone after sa maong insidente," matud Taneo.

"I-find out pa namo unsa nga sumpaki ang nahitabo," dugang ni Taneo.

Nahibaw-an nga kalibre .45 nga armas ang gigamit sanglit dunay nakuha nga duha ka buhing bala sa maong armas diha sa crime scene.

Pipila sa mga residente sa maong lugar wala magdahom nga gipamusil na ang duha kay nagtuo lang sila nga fireworks ang maong sunod-sunod nga buto nga milanog sa ilang dapit.

Ang paryente sa maong gipatay nga babaye, nagtuo nga naamong lang kini sa kapuyo. Ang ginang adunay tulo ka anak.

Dako ang pagtuo sa maong paryente nga walay kontra ang maong babaye ug dili sila motuo nga dunay relasyon ang mga biktima kay ang ilang nahibaw-an suod silang managhigala.

Pipila sa mga silingan ang mibutyag nga napriso na kaniadto ang mga biktima tungod sa sugal apan tan-awon pa kini sa kapulisan.— /IBM (BANAT NEWS)