17-anyos apil sa nagpusil sa ginang, nadakpan

CEBU, Philippines — Usa sa mga nagpusil patay sa ginang sa Purok Bugnay, Sitio Bugna, Barangay Jaclupan, sa Siyudad sa Talisay niadtong Miyerkules sa tungang gabii ang nadakpan sa kapolisan samtang gipangita pa ang duha ka mga kauban niini nga nailhan na sab sa mga otoridad.

Ang gipatay mao si Emerina Entis Barias, 46, nagpuyo sa nahisgutang dapit. Ang nadakpan nag-edad og 17 anyos samtang gipangita pa ang laing duha nga positibong giila sa 10-anyos nga anak sa biktima. Ang Banat News dili una mopagawas sa pangalan sa duha samtang nagpadayon pa ang imbestigasyon sa kapolisan.

Si Police Lt. Col. Randy Caballes, hepe sa kapolisan sa Talisay miingon nga nanuktok ang tulo tungang gabii anang adlawa ang mga suspek ug gipangita si Jorem Entis Barias apan wala kini didto.

Ang biktima nga maoy nangabli kanila, matud pa gidiretso og pusil sa mga suspek atubangan sa laing anak niini nga 10-anyos.

Sumala pang Caballes, atol sa pagbuhat sa krimen naa ra sa katupad nga balay ang gipangita a mga suspek kinsa dali sab nga nibalik sa ilaha ug naabtan ang mga mamumuno.

Matud pa ni Caballes nga nakiglinayogay pa sa usa sa mga suspek si Jorem ug natigbasan niini ang usa. Duna say .38 nga rebolber nga adunay upat ka bala nga nabiyaan sa mga mamumuno sa ilang pagikyas.

Gisubay nila ni Caballes nga personal nga bangi ug may kalambigitan sa ilegal nga drugas ang motibo sa krimen.

Wala magdugay nadakpan ang usa sa mga suspek nga sa krimen nga usa ka menor de edad nga nagpangidaron og 17 anyos. (BANAT NEWS)